BAYRAQDAR MEDİA – AMEA Mərkəzi Elmi Kitabxanasında Azərbaycanda geomorfologiya, landşaftşünaslıq və toponimika elmi məktəblərinin banilərindən biri, görkəmli alim, ictimai-siyasi xadim, “Şöhrət” və “Şərəf” ordenli, Əməkdar elm xadimi, coğrafiya elmləri doktoru, professor, akademik Budaq Əbdüləli oğlu Budaqovun anadan olmasının 95 illiyi münasibətilə “Budaq Budaqov-95” adlı kitab sərgisi təşkil edilib.
Xəbər BAYRAQDAR MEDİA-ya fevralın 28-də MEK-dən daxil olub.
Xəbərdə qeyd olunur ki, “sərgidə alimin Azərbaycan və rus dilində olan əsərləri, elmi redaktoru olduğu, redaktə etdiyi, tərtib etdiyi, ön söz yazdığı və görkəmli alim haqqında yazılmış kitablar nümayiş olunur. Dəyərli nəşrlər sırasında “Coğrafiya elminin uğurları”, “Dözümlü, dözümsüz təbiət”, “Təbiət poeziya işığında”, “Böyük İpək Yolu”, “Ümumi geomorfologiya”, “Cənub-şərqi Qafqazın geomorfologiyası və yeni tektonikası”, “Türk uluslarının yer yaddaşı”, “Ermənistanda Azərbaycan mənşəli toponimlərin izahlı lüğəti”, “Gürcüstanda olan türk toponimlərinin izahlı lüğəti”, “Avrasiyanın türk toponimləri” kimi mühüm elmi əhəmiyyətə malik kitablar yer alır”.
Qeyd edək ki, sərgi həftə ərzində davam edəcək.
