Son yeniləmə: 16 Fevral 2023 14:40
BAYRAQDAR MEDİA – Fevralın 24-də Heydər Əliyev Mərkəzində Cəlil Məmmədquluzadənin “Ölülər” pyesi nümayiş olunacaq. Tamaşa Ümummilli lider Heydər Əliyevin anadan olmasının 100 illiyinə həsr edilmiş “Heydər Əliyev və milli teatr sənəti” layihəsi çərçivəsində nümayiş olunacaq.
Tamaşa sözügedən Mərkəzin və Mədəniyyət Nazirliyinin birgə təşkilatçılığı ilə Dövlət Akademik Milli Dram Teatrının təqdimatında göstəriləcək.
Bu barədə teatrın paylaşdığı məlumatda qeyd edilib.
Bildirilib ki, tamaşada əsas rolları Xalq artisti Nurəddin Mehdixanlı (Şeyx Nəsrullah), Əməkdar artist Aslan Şirin (Şeyx Əhməd), Xalq artisti Kazım Abdullayev (Hacı Həsən), Xalq artisti Laləzar Mustafayeva (Kərbəlayi Fatma), Əməkdar artist Anar Heybətov (İsgəndər) canlandıracaq.
Qeyd edək ki, biletləri Mərkəzin kassasından, iticket.az satış məntəqələri və saytından əldə etmək olar.
