Son yeniləmə: 10 Fevral 2023 16:42
BAYRAQDAR MEDİA – “Yardımların pensiya məbləğinə əlavə olunmasından sonra indeksasiyanın aparılması artıq reallaşmaqdadır. Dövlət Statistika Komitəsi 10 fevral 2022-ci ildə orta aylıq əmək haqqında artım faizini elan edib”.
Bunu iqtisadçı deputat Vüqar Bayramov fevralın 10-da sosial media paylaşımında bildirib. O, qeyd edib ki, bütün növ əmək pensiyalarında 14.7 faiz artım olacaq. Ölkə Prezidenti tərəfindən sərəncam imzalandıqdan sonra pensiyalardakı artım reallaşacaq.
“Vahid indeksasiya sistemi bütün əmək pensiyası alan vətəndaşlarımızın pensiya məbləğinin hər il yanvar ayında əvvəlki il üzrə orta aylıq əmək haqqındakı artım faizinə uyğun artırılmasını nəzərdə tutur. Ötən il pensiyası 300 manat olan vətəndaşımız üçün ikinci artım faizi belə hesablanacaq: 316.7 manat X indeksasiya faizi = yeni pensiya məbləği. Yəni, 316.7 manat x 14.7 faiz = 46.55 manat. Bizim nümunədə, 300 manat pensiya alan vətəndaşımızın hər iki artımdan sonra pensiya məbləği belə olacaq: 300 manat + 16.7 manat + 46.55 manat = 363.25 manat. Bu artım hər ay ödəniləcək”, – deyə xəbərdə bildirilib.
Həmçinin, 2022-ci ildə orta aylıq əmək haqqında artımla bağlı rəsmi statistika fevralda bəlli olduğu üçün indeksasiya da məhz o zaman aparılır. Pensiya artımları yanvarın 1-dən hesablanır, amma ikinci artımlar fevral ayında ikisi birlikdə ödəniləcək. Bu o deməkdir ki, 300 manat pensiya alan pensiyaçının fevral ayında ödənişi belə olacaq: 300 manat + 16.7 manat + 46.55 manat (yanvar üzrə indeksasiya artımı) + 46.55 manat (fevral üzrə indeksasiya artımı) = 409.8 manat. Deməli, 300 manat pensiya alan vətəndaşımızın pensiya məbləği fevral ayında 409.8 manat, mart ayından etibarən isə aylıq 363.25 manat alacaq.
Qeyd edək ki, qanunvericiliyə edilən dəyişikliklərdən sonra bütün əmək pensiyası alan vətəndaşların pensiyalarında artım hesablanacaq.
