BAYRADAR MEDİA – Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti Abşeron Logistka Mərkəzində (ALM) olub.
AzTU-nun mətbuat xidmətindən BAYRAQDAR MEDİA-ya fevralın 9-da verilən xəbərə görə, AzTU-nun rektoru V.Vəliyev və ALM İdarə Heyətinin sədri Ziya Ağayev arasında görüş keçirilib: “Rektor AzTU-da nəqliyyat və logistika sahəsində görülən işlər, həmçinin Logistika və Nəqliyyat İnstitutunun fəaliyyət istiqamətləri, həyata keçirdiyi layihələr barədə məlumat verib. Qeyd olunub ki, magistr tələbələr üçün müvafiq fənlərin ALM-də keçirilməsi onların perspektiv inkişafı istiqamətində uğurlu ola bilər. Eyni zamanda, ALM-nin mütəxəssislərinin AzTU-da tədrisə cəlb olunması da tədrisin keyfiyyətinin yüksəldilməsinə öz töhfəsini verə bilər”.
Xəbərdə daha sonra bildirilib ki, “ALM-nin İdarə Heyətinin sədri Z.Ağayev qeyd olunan məsələlərinin önəmini vurğulayıb və işlərin operativ həlli üçün müştərək komissiyanın yaradılmasını təklif edib”.
Sonra ALM-də AzTU-nun tədris mərkəzinin açılışı olub: “Mərkəzin açılmasında əsas məqsəd bakalavriat, magistratura və doktorantura səviyyələrində təhsil alan tələbələrə sənayenin problemləri ilə daha yaxından tanış olmaq, tədris prosesi və tədqiqatları bilavasitə istehsalat şəraitində yerinə yetirmək imkanı yaratmaqdan ibarətdir. Tələbələrin praktik dərslərinin əsasən mərkəzdə təşkil olunması da planlaşdırılıb”.
Xəbərdə o da qeyd edilib ki, tədris mərkəzində AzTU-nun Nəqliyyat və logistika fakültəsinin tələbələri təhsil alacaq.
