BAYRAQDAR MEDİA – “Paytaxtdakı 62 nömrəli məktəb-liseyin X sinif şagirdi Həsən Quliyev Bakı Şəhəri üzrə Təhsil İdarəsi (BŞTİ) tərəfindən ali məktəblərlə birgə həyata keçirilən startap proqramının rəhbəri seçilib”.
BŞTİ-dən fevralın 8-də BAYRAQDAR MEDİA-ya verilən xəbərə görə, bununla əlaqədar qurumun rəhbəri Mehriban Vəliyeva H.Quliyevlə görüşüb.
İdarə müdiri startapçı məktəblilərin layihələri ilə bağlı görülən işlərə diqqət çəkərək bildirib ki, BŞTİ ilə Dövlət Neft və Sənaye Universiteti, həmçinin Texniki Universitet arasında startap layihələrlə bağlı görüşlər keçirilib.
Verilən məlumatda, “görüşlər zamanı Bakı şəhərində yerləşən ümumi təhsil məktəblərində şagirdlərin startap ideyalarının dəstəklənməsində kömək göstərilməsi və bu istiqamətdə ali məktəblərlə birgə həyata keçiriləcək işlərdən danışılıb. İdarə müdiri, həmçinin, startap proqramı ilə əlaqədar digər universitetlərlə də əlaqələrin qurulmasının nəzərdə tutulduğunu qeyd edib. M.Vəliyeva startap proqramı üzrə elektron qeydiyyat sisteminin yaradılmasının və seçim meyarlarının formalaşdırılmasının da nəzərdə tutulduğunu bildirib”, – deyə qeyd edilir.
Bildirək ki, H.Quliyev pilotsuz uçuş aparatlarının (PUA) hazırlanması ilə məşğuldur. O, aerokosmik startap layihəsi olan “AzAstro Texnologiyaları”nı təsis edib. İstedad və bacarığı ilə həmyaşıdlarından fərqlənən H.Quliyev oxuduğu məktəbdə “Kiçik Akademiya”nın prezidenti, həmçinin “AzAstro” startapının həmtəsisçisi və əməliyyatlar direktorudur.
