Qərbi Azərbaycan İcmasından Azərbaycanın İrandakı səfirliyinə qarşı törədilən terror aktını qınayan bəyanat
BAYRAQDAR MEDİA – Qərbi Azərbaycan İcması Azərbaycan Respublikasının İran İslam Respublikasındakı səfirliyinə edilmiş silahlı hücumu şiddətlə qınayır. Bu fikirlər qurumun bəyanatında öz əksini tapıb.
Bununla bağlı BAYRAQDAR MEDİA-ya İcmanın mətbuat xidmətindən məlumat verilib.
Məlumata görə, bəyanatda daha sonra deyilir: “Silahlı hücum nəticəsində şəhid olmuş Azərbaycan Respublikasının hərbi qulluqçusu, əslən Qərbi Azərbaycanın Göyçə mahalının Nərimanlı kəndindən olan baş leytenant Orxan Əsgərovun ailəsinə, yaxınlarına və xidmət yoldaşlarına dərin hüznlə başsağlığı verir və yaralananlara şəfa diləyirik. Elçilərin toxunulmazlığına dair İslam ehkamlarına və beynəlxalq normalarına hörmətsizliyin və xarici dövlətlərin səfirliklərinə xain hücumların İranda ənənəyə çevrilməsi təəssüf doğurur”.
“İcma tutduğu vəzifəsindən asılı olmayaraq, bu hücumun sifarişçilərinin, təşkilatçılarının və icraçılarının dərhal həbsini və tərəfsiz ədalət məhkəməsinə təslim olunmasını tələb edir” deyə bəyanatda daha sonra qeyd edilib.
