BAYRAQDAR MEDİA – Yanvarın 23-də Nazirlər Kabineti “Nəqliyyat vasitələrinin şüşələrinə örtüklərin çəkilməsi Qaydası”nı təsdiq edib.
Bu haqda xəbəri BAYRAQDAR MEDİA-ya NK-dən veriblər.
NK təsdiq edilmiş qaydanın izahını da əlavə olaraq mediaya təqdim edib.
Qaydaya görə, “nəqliyyat vasitələrinin sürücüdən arxa tərəfdə yerləşən yan şüşələrinə, yük yerinin yan şüşələrinə və arxa şüşələrinə aşağıdakı örtüklərin çəkilməsinə yol verilir:
-minik avtomobillərində – plyonka çəkilməsinə və ya jalüzlərin quraşdırılmasına;
-yük avtomobillərində, avtobuslarda, mikroavtobuslarda, trolleybuslarda və tramvaylarda – plyonka çəkilməsinə (sərnişindaşıma fəaliyyətində istifadə olunan avtobuslar və mikroavtobuslar istisna olmaqla), jalüzlərin quraşdırılmasına və ya pərdə asılmasına”.
İzahda daha sonra bildirilir ki, “nəqliyyat vasitələrinin küləyə qarşı olan ön şüşəsinin yuxarı hissəsinə, hər iki tərəfdə arxanı göstərən xarici güzgülər olduqda, nəqliyyat vasitələrinin sürücüdən arxa tərəfdə yerləşən yan şüşələrinə, yük yerinin yan şüşələrinə və arxa şüşələrinə çəkilməsinə yol verilən örtüklərin işıqburaxma qabiliyyətinin həddi məhdudlaşdırılmır”.
“Nəqliyyat vasitələrinin küləyə qarşı olan ön şüşəsinin yuxarı hissəsinə istehsalçı zavod tərəfindən quraşdırılmış günlüklərin hündürlüyü səviyyəsində, nəqliyyat vasitələrinin konstruksiyasında günlüklər nəzərdə tutulmadıqda isə 15 sm-dən çox olmamaq şərtilə plyonka çəkilməsinə yol verilir.” Bu da qaydaya əlavə edilən izahda qeyd edilib.
