Son yeniləmə: 23 Yanvar 2023 10:25
BAYRAQDAR MEDİA – “Respublikamızın bütün bölgələrində olduğu kimi, Azərbaycan Ordusunun qoşun növləri, Əlahiddə Ümumqoşun Ordusu, birlik, birləşmə, hərbi hissə və xüsusi təyinatlı təhsil müəssisələrində də “Heydər Əliyev İli” ilə bağlı tədbirlər keçirilir. Tədbirlərdə Azərbaycan xalqının Ümummilli Lideri, müasir, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin zəngin həyat yolu və həmişə fəxr etdiyi doğma Vətəni, Azərbaycan xalqı və dövləti qarşısında müstəsna xidmətləri bir daha xatırlanır, geniş təbliğ olunur, bu gün və gələcəkdə də nümunə qaynağı olan irsi dərindən öyrənilir”.
Bunu BAYRAQDAR MEDİA-ya Müdafiə Nazirliyindən bildiriblər.
Qeyd edilib ki, Azərbaycan Ordusunun Təlim və Tədris Mərkəzində nazirliyin təşkilatçılığı ilə “Heydər Əliyev İli” çərçivəsində “Ulu Öndərin sevimli qəhrəmanları” silsiləsindən görkəmli sərkərdə, iki dəfə Sovet İttifaqı Qəhrəmanı, tank qoşunları qvardiya general-mayoru Həzi Aslanovun xatirəsinə həsr olunmuş vətənpərvərlik tədbirləri həftəsinə başlanılıb: “Təntənəli mərasim başlamazdan əvvəl H.Aslanovun Mərkəzdə ucaldılan abidəsi ziyarət olunub və qarşısına qızılgül çələngi qoyulub, güllər düzülüb”.
Nəzərə çatdırılıb ki, Ulu Öndər Heydər Əliyev 9 may 1994-cü ildə şəxsən bu abidənin açılışını edib, veteranların və gələcəyin zabitləri olacaq kursantların qarşısında geniş nitq söyləyib.
Məlumata əsasən, abidə ziyarət olunduqdan sonra tədbir iştirakçıları görkəmli sərkərdə H.Aslanova həsr olunan fotosərgi ilə tanış olublar.
Təlim və Tədris Mərkəzinin klubunda keçirilən mərasimi layihənin müəllifi, Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani açıb. O, H.Aslanovun hər bir gənc üçün bu gün də örnək olan mənalı həyatı və döyüş yolu, eləcə də xalqımızın Ümummilli Lideri Heydər Əliyevin qəhrəmanın adının əbədiləşdirilməsi sahəsində tarixi xidmətləri barədə ətraflı məlumat verib.
Şəxsi Heyət Baş İdarəsi rəisinin müavini-Kadrlar İdarəsinin rəisi general-mayor Elçin Xəlilov “Ulu Öndərin sevimli qəhrəmanları” silsiləsindən vətənpərvərlik tədbirləri həftəsinin proqramı barədə tədbir iştirakçılarını məlumatlandırıb.
General-mayor E.Xəlilov qeyd edib ki, Vətən müharibəsində möhtəşəm zəfərin qazanılmasında digər qoşun növləri ilə yanaşı, H.Aslanovun davamçıları olan Azərbaycan tankçılarının da müstəsna xidmətləri olub: “Məhz Vətən müharibəsindən 9 ay əvvəl Azərbaycan Prezidenti İlham Əliyevin Həzi Aslanovun 110 illik yubileyinin keçirilməsi haqqında Sərəncamı müharibə ərəfəsində Vətən müdafiəçilərinin mənəvi-psixoloji hazırlığının, döyüş ruhunun, vətənpərvərlik hissinin daha da yüksəldilməsinə zəmin yaradıb. “Hər birimiz Həziyik, hər bir əmrə hazırıq” devizi altında keçirilən tədbirlərdə Azərbaycan əsgər və zabitləri söz veriblər, and içiblər ki, Ali Baş Komandanın hər bir əmrinə hər an hazır olacaq, respublikamızın ərazi bütövlüyünün bərpası, işğal edilən tarixi torpaqlarımızın azad edilməsi uğrunda canlarından və qanlarından da keçəcəklər.
Qeyd edilib ki, “Vətən Müharibəsi Qəhrəmanı” adına layiq görülən, yüksək döyüş orden və medalları ilə təltif olunan döyüşçülərimizin sıralarında əfsanəvi qəhrəman H.Aslanovun davamçıları olan tankçılar da yetərincədir”.
General-mayor E.Xəlilov əmin olduğunu bildirib ki, bu tədbirlər də yüksək səviyyədə keçiriləcək və Azərbaycan Ordusunun şəxsi heyətinin vətənpərvərlik hissini daha da yüksəldəcəkdir: “E.Xəlilov alqışlar altında “Heydər Əliyev İli” çərçivəsində “Ulu Öndərin sevimli qəhrəmanları” silsiləsindən tank qoşunları qvardiya general-mayoru Həzi Aslanovun xatirəsinə həsr olunmuş vətənpərvərlik tədbirləri həftəsini açıq elan edib.
Sonra Bakı Bələdiyyə teatrı yaradıcı kollektivinin ifasında A.Qurbaninin “Həzi Aslanov xatirələr işığında” adlı pyesi əsasında hazırlanan tamaşadan parçalar nümayiş etdirilib.
Tamaşa tədbir iştirakçıları tərəfindən alqışlarla qarşılanıb. Tamaşanın sonunda Bakı Bələdiyyə teatrı Azərbaycan Ordusunun şəxsi heyətinə göstərdiyi mədəni xidmətlərə görə Müdafiə Nazirliyinin Fəxri Fərmanı ilə təltif olunub.
Təbirin sonunda igid sərkərdənin nəvəsi polis polkovnik-leytenantı Emin Aslanov Ulu Öndər Heydər Əliyevin daim qəhrəmanın ailəsinə diqqət və qayğı göstərdiyini yada salıb, Azərbaycan Prezidenti, Müzəffər Ali Baş Komandan İlham Əliyevə və Müdafiə Nazirliyinin rəhbərliyinə ali diqqət üçün Aslanovlar ailəsi adından minnətdarlıq edib.
