“Bayraktar TB-2” üçün ixrac müqaviləsi imzalanan ölkələrin sayı 28-ə çatıb
BAYRAQDAR MEDİA – “Baykar” və Küveyt Müdafiə Nazirliyi arasında “Bayraktar TB-2”nin ixracı üçün müqavilə imzalanıb. 2019-cu ilin iyul ayından davam edən prosesdə Amerika, Avropa və Çindən önəmli şirkətlərin yer aldığı müsabiqənin qalibi Türkiyənin “Baykar” şirkəti olub.
Bu barədə BAYRAQDAR MEDİA-ya yanvarın 18-də “Baykar” şirkətindən məlumat verilib.
Bildirilib ki, beynəlxalq aləmdə özünü doğrultmuş “Bayraktar TB-2” üçün Küveyt Müdafiə Nazirliyi ilə 370 milyon dollarlıq müqavilə imzalanıb: “Beləliklə, “Bayraktar TB-2” üçün ixrac müqaviləsi imzalanan ölkələrin sayı 28-ə çatıb. Qeyd edək ki, “Baykar” və Küveyt Müdafiə Nazirliyi arasında proses 2019-cu ildə başlayıb. Amerika, Avropa və Çin şirkətlərinin də iştirak etdiyi rəqabət prosesinin qalibi Türkiyənin milli S/PUA-sı “Bayraktar TB-2” olub. “Bayraktar TB-2” S/PUA 2019-cu ilin iyul ayında Küveytdə demo uçuşunda böyük uğur qazanıb. Yüksək temperatur, qum fırtınası kimi çətin coğrafi-iqlim şəraitində 27 saat 3 dəqiqə fasiləsiz uçaraq, o vaxt özünə məxsus havada qalma rekordunu qırıb”.
