Son yeniləmə: 22 Dekabr 2022 16:16
Vüqar Bayramov: Dekabrın 14-də keçirilən zirvə görüşü Azərbaycan, Türkiyə və Türkmənistan arasında üçtərəfli münasibətlərin dərinləşməsinə imkan verəcək
BAYRAQDAR MEDİA – “Məlum olduğu kimi, dekabrın 14-də Türkmənbaşı şəhərində türk dünyasının üç lideri bir araya gəldi. Türkiyə, Azərbaycan və Türkmənistan prezidentlərinin Birinci Üçtərəfli Zirvə Görüşündə regional əməkdaşlıq məsələləri müzakirə edildi”.
Bunu BAYRAQDAR MEDİA-ya özəl açıqlamasında Milli Məclisin deputatı Vüqar Bayramov deyib.
Türkmənbaşı şəhərində keçirilən görüşü dəyərləndirən millət vəkili bildirib ki, Türk Dövlətləri Təşkilatının yaradılması, bu istiqamətdə aparılan müzakirələr praktiki olaraq təkcə Türkiyə-Azərbaycan deyil, eyni zamanda Orta Asiya türk dövlətləri ilə Azərbaycan və Türkiyə arasında münasibətlərin yeni mərhələyə qədəm qoymasından xəbər verir: “Bu kontekstdən dekabrın 14-də keçirilən zirvə görüşü Azərbaycan, Türkiyə və Türkmənistan arasında üçtərəfli münasibətlərin dərinləşməsinə imkan verəcək. Türkmənistan strateji olaraq Azərbaycan və Türkiyə ilə əlaqələrin daha da gücləndirilməsində maraqlıdır. Azərbaycanla Türkmənistan arasında anlaşma var. Həmin anlaşmaya əsasən, Türkmənistan mavi yanacağı İran vasitəsilə mübadilə formasında Azərbaycana təqdim edir. Müqaviləyə görə, illik iki milyard kubmetrədək qazın mübadiləsi nəzərdə tutulur”.
V.Bayramov deyib ki, Türkmənistan qazı Azərbaycan və Türkiyə vasitəsilə Avropa ölkələrinə ixrac edilə bilər: “Ona görə də qaz nəqli, bütövlükdə Türkiyənin enerji ixracatında qovşağa çevrilməsi indiki halda müzakirə edilən məsələdir. Bu zirvə görüşü iqtisadi əlaqələri genişləndirməklə yanaşı enerji sahəsində yeni addımların atılmasına imkan yarada bilər. Nəqliyyat, logistika və beynəlxalq yük daşımalar da tərəflərin diqqət mərkəzində olan məsələlərdəndir. Bir sözlə, 1.2 trilyon nominal, 4 trilyon 586 milyard dollar real ÜDM-ə malik olan türk dünyası birləşir və güclənir. 21-ci əsr türk əsridir”.
