BAYRAQDAR MEDİA – Dekabrın 22-də Prezident İlham Əliyev “Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi haqqında” Fərman imzalayıb. Fərman ölkə Konstitusiyasının 109-cu maddəsinin (Azərbaycan Respublikası Prezidentinin səlahiyyətləri) 32-ci bölməsinə (bu Konstitusiya ilə Azərbaycan Respublikası Milli Məclisinin və məhkəmə orqanlarının səlahiyyətlərinə aid edilməyən digər məsələləri icra qaydasında həll edir) əsasən imzalanıb.
Xəbəri Prezidentin Mətbuat xidməti yayıb.
Fərmanla Naxçıvandakı bütün dövlət işlərinə səlahiyyətli nümayəndə başçılıq edəcək. Bütün dövlət qurumları Naxçıvanla bağlı fəaliyyətlərini bu nümayəndə ilə əlaqələndirməli olacaq.
Prezident eyni gündə səlahiyyətli nümayəndəliklə bağlı Əsasnaməni də imzalayıb.
Daha sonra xəbər verilir ki, İ.Əliyev “Yerli icra hakimiyyətləri haqqında Əsasnamə”də dəyişiklik edilməsi barədə Fərman da imzalayıb. Dəyişikliyə görə sözügedən sənədin bir sıra maddələrindən “Naxçıvan Muxtar Respublikasının ali vəzifəli şəxsinin fərman və sərəncamlarını, Naxçıvan Muxtar Respublikası Nazirlər Kabinetinin qərar və sərəncamlarını”, “, Naxçıvan Muxtar Respublikasında isə Naxçıvan Muxtar Respublikası Ali Məclisinin sədri ilə”, “, Naxçıvan Muxtar Respublikasında isə həm də Naxçıvan Muxtar Respublikası Ali Məclisi sədrinin tapşırıqlarını”, “, Naxçıvan Muxtar Respublikasında həm də Naxçıvan Muxtar Respublikasının ali vəzifəli şəxsinə”, “, Naxçıvan Muxtar Respublikasında isə həm də Naxçıvan Muxtar Respublikası Ali Məclisinin sədrinə” sözləri çıxarılıb.
Növbəti Sərəncamla isə Prezident Fuad Vahid oğlu Nəcəflini Naxçıvan Muxtar Respublikasında səlahiyyətli nümayəndə təyin edib.
Prezidentin Mətbuat xidməti xəbər verir ki, İ.Əliyev Sərəncamların ardından F.Nəcəflini qəbul edib.
“Prezident İlham Əliyev tapşırıq verib ki, səlahiyyətli nümayəndə kimi Fuad Nəcəfli insanların qayğısına qalınması, korrupsiya, rüşvətxorluqla mübarizə, şəffaflıq, düzgün kadr siyasətinin həyata keçirilməsi, mərkəzi icra orqanları ilə sıx təmasda fəaliyyətlə bağlı bütün səylərini göstərsin”, – deyə xəbərdə bildirilir.
