Ramil İskəndərli: Tələblər yerinə yetirilməyənə qədər aksiyanın dayandırılması qeyri-mümkündür
BAYRAQDAR MEDİA – “Məlum olduğu kimi, flora və faunamıza qarşı törətdilən cinayətlərə, həmçinin təbii sərvətlərimizin qanunsuz istismarına etiraz olaraq qeyri-hökümət təşkilatlarının rəhbərləri, bir qrup fəal dekabrın 12-də Laçın-Şuşa yolunda dinc aksiya keçirməyə başlayıb. Aksiya artıq 9-cu gündür ki, davam edir və tələblər yerinə yetirilməyənə qədər dayandırılması qeyri-mümkündür. Təxmin etmək olar ki, hadisələr bu cür davam etsə, aksiyaçılar yeni – 2023-cü ili Laçın-Xankəndi yolunda keçirməli olacaqlar”.
Bunu BAYRAQDAR MEDİA-ya özəl açıqlamasında Rusiya sülhməramlılarının müvəqqəti nəzarətində olan Şuşa-Xankəndi yolunun bir hissəsində Qarabağ iqtisadi rayonunda ekoloji terrora son qoyulması tələbi ilə keçirilən etiraz aksiyasında ilk iki gündə iştirak etmiş “Hüquqi Təhlil və Araşdırmalar” İctimai Birliyinin sədri Ramil İskəndərli deyib.
“Bəs bu aksiyanın uğurla həyata keçirilməsini hansı amillər şərtləndirdi” sualını cavablandıran R.İskəndərli bildirib: “Heç kimə sirr deyil ki, QHT anlayışı bir çox insanlarda heç də birmənalı münasibət yaratmırdı. Kimisi bunu anti-hökumət, kimisi müxalifət kimi qəbul edir, kimisi isə ümumiyyətlə bu cür təşkilatları qeyri-rəsmi bir özfəaliyyət dərnəyi kimi qəbul edirdi. Lakin QHT-lərin xüsusilə son 2-3 ildəki fəaliyyəti, şəffaflıq, hesabatlılıq onların ümummilli məsələlərdə dövlətin yanında olduğunu, eyni zamanda son aksiya isə, qətiyyətlə deyə bilərəm ki, bu qurumların heç də bir institut olaraq hökumət əleyhinə olmayan təsisat olduğunu isbatladı. Bu günlərdə aksiyada iştirakımla bağlı təəssüratlarımı bölüşdüyüm insanların QHT-lərə bir rəğbət hissinin formalaşdığının və QHT-lərin milli əhəmiyyətli məsələlərdə vacib rolunun qəbul edildiyinin şahidi oluram”.
Qeyd edilib ki, eyni zamanda Xankəndi yolunda keçirilən aksiya ölkədə vətəndaş cəmiyyəti və dövlət arasında həyata keçirilən əməkdaşlıq və dialoqun real bəhrəsini verməsi deməkdir: “QHT-lərin azad edilmiş ərazilərdə etiraz aksiyasının keçirilməsi kimi, belə bir həssas və strateji olan məsələdə öncül olmasını da məhz bu əməkdaşlıq və dialoq şərtləndirdi”.
