Son yeniləmə: 17 Dekabr 2022 13:35
Seymur Verdizadə: Bu aksiya Azərbaycanda milli dövlət maraqlarını şəxsi maraqlarından üstün tutan QHT sektorunun formalaşdığını sübut etdi
BAYRAQDAR MEDIA – Artıq altıncı gündür ki, Azərbaycanın bir qrup vətəndaş cəmiyyəti və media təmsilçisi Ermənistandan Xankəndinə gələn Laçın yolunda etiraz aksiyası keçirir. Dekabrın 15-də etirazçılar yeni tələblərlə çıxış ediblər. Aksiyaya dəstək isə hər keçən gün daha da artır.
Məsələyə münasibət bildirən Jurnalist Araşdırmaları Mərkəzinin (JAM) sədri Seymur Verdizadə deyib ki, bu aksiyada Azərbaycan QHT-lərinin əzmkarlığı milli maraqların müdafiəsinə yönəlib: “Bu aksiya Azərbaycanda milli dövlət maraqlarını şəxsi maraqlarından üstün tutan QHT sektorunun formalaşdığını sübut etdi”.
S.Verdizadə BAYRAQDAR MEDİA-ya açıqlamasında onu da bildirib ki, son bir neçə ildə Azərbaycanda peşəkar QHT institutları formalaşıb: “Təqdirəlayiq haldır ki, bu institutlar beynəlxalq təşkilatlarda Azərbaycanın haqlı mövqeyini qoruya, Ermənistanın təcavüzkar siyasətini, müharibə cinayətlərini ifşa edə bilir. QHT-lərimizin beynəlxalq təşkilatlara və xaricə çıxışı ilbəil artır. Beynəlxalq təşkilatlarla işləyən QHT-lərin səyləri Azərbaycan həqiqətlərinin dünyaya çatdırılmasına xidmət edir. QHT Agentliyinin fəaliyyəti isə bu prosesi daha da stimullaşdırır”.
S.Verdizadə onu da əlavə edib ki, Azərbaycanda QHT-lərin fəaliyyətinin genişlənməsi üçün onların maddi-texniki bazasının gücləndirilməsinə ehtiyac var. O, bu yöndə daha təsirli addımların atılacağına ümid etdiyini deyib.
JAM sədri, həmçinin, Azərbaycan dövlətinin ölkədə güclü QHT institutlarının formalaşmasında maraqlı olduğunu vurğulayıb.
