BAYRAQDAR MEDİA – 2022-ci ilin yanvar-noyabr ayları üzrə operativ məlumatlara əsasən, Azərbaycanda 42,5 milyard kubmetr təbii qaz hasil edilib.
Bu barədə BAYRAQDAR MEDİA-ya dekabrın 15-də Energetika Nazirliyindən məlumat verilib.
Bildirilib ki, qazın 12,2 milyard kubmetri “Azəri-Çıraq-Günəşli”dən, 23 milyard kubmetri “Şahdəniz”dən, 7,3 milyard kubmetri SOCAR üzrə hasil olunub. 2021-ci ilin müvafiq dövrünə nisbətən 7 faiz, yəni 2,8 milyard kubmetr artımla qaz hasil edilib.
Qeyd olunub ki, hesabat dövründə xaricə qaz satışı 20,1 milyard kubmetr təşkil edib: “Bu da ötən ilin müvafiq dövrü ilə müqayisədə 19 faiz çoxdur. 11 ayda Avropaya 10,3 milyard kubmetr, Türkiyəyə 7,6 milyard kubmetr, Gürcüstana isə 2,2 milyard kubmetr qaz satılıb. Bu dövrdə Türkiyəyə TANAP vasitəsilə 5,2 milyard kubmetrə yaxın qaz nəql olunub”.
Vurğulanıb ki, “Azəri-Çıraq-Günəşli” və “Şahdəniz” yataqları istismara veriləndən cari ilin 1 dekabr tarixinədək “Azəri-Çıraq-Günəşli”dən 202,3 milyard kubmetr, “Şahdəniz”dən isə 180,5 milyard kubmetrə yaxın qaz hasil edilib: “Bu dövrdə “Şahdəniz” yatağından hasil edilən qazın 126,1 milyard kubmetr həcmi ixraca nəql edilib. 2022-ci ilin yanvar-noyabr ayları ərzində ölkədə 29,8 milyon ton neft (kondensatla birlikdə) hasil edilib. Neft hasilatının 18,7 milyon tonu “Azəri-Çıraq-Günəşli”nin, 4 milyon tonu (kondensat) “Şahdəniz”in payına düşüb. SOCAR üzrə neft (kondensatla birlikdə) hasilatı 7,1 milyon ton təşkil edib. Hesabat dövründə 24 milyon ton neft (kondensatla birlikdə) ixraca nəql olunub. Bunun 22,7 milyon tona yaxını konsorsiumun, 1,3 milyon tonu isə SOCAR-ın payına düşüb”.
“Azəri-Çıraq-Günəşli” və “Şahdəniz” yataqları istismara veriləndən 1 dekabr 2022-ci il tarixinədək 605 milyon tona yaxın neft (kondensatla birlikdə) hasil edilib. “Azəri-Çıraq-Günəşli”dən 565,2 milyon ton neft, “Şahdəniz”dən isə39,8 milyon ton kondensat çıxarılıb. Bundan cari ilin 01 dekabr tarixinədək 603 milyon tonu ixraca nəql edilib.
Ölkədə neftin emalı 2022-ci ilin 11 ayı ərzində 5,7 milyon ton təşkil edib.
