Rəşad Məmmədov: Prezident İlham Əliyevin tapşırığı ilə Azərbaycan tərəfindən inşa olunacaq bu abidə qəhrəman Azərbaycan övladlarının xatirəsini uğruna can verdikləri torpaqlarda ölümsüzləşdirəcəkdir
BAYRAQDAR MEDİA – 1915-ci ildə türk torpaqlarının azadlığı uğrunda gedən döyüşlərdə şəhid olan Azərbaycan əsgərlərinin xatirəsinə Çanakkalede ucaldılacaq abidənin təməlqoyma mərasimi keçirilib. Mərasimdə Azərbaycanın Türkiyədəki səfiri Rəşad Məmmədov, Azərbaycan – Türkiyə Parlamentlərarası İşçi Qrupun rəhbəri Əhliman Əmiraslanov, Çanakkale valisi İlhami Aktaş, Çanakkale Döyüşləri Gelibolu Tarixi Bölgə Baş İdarəsinin (ÇDGTBBİ) rəisi İsmayıl Kaşdemir, vilayətin digər rəsmi şəxsləri, qazilər və ictimaiyyət nümayəndələri iştirak ediblər.
Bu barədə BAYRAQDAR MEDİA-ya səfirlikdən məlumat verilib.
Bildirilib ki, mərasim şəhidlərin xatirəsinə bir dəqiqəlik sükut və Azərbaycan və Türkiyənin himnləri ilə başlayıb: “Səfir R.Məmmədov açılış çıxışında Çanakkalenin müqəddəs bir yer olduğunu, 100 il öncə azərbaycanlıların bu torpaqlarda öz qardaşları ilə birlikdə düşmənə qarşı döyüşərək şəhid olduqlarını bildirib”.
Səfir qeyd edib ki, Azərbaycan Prezidenti İlham Əliyevin tapşırığı ilə Azərbaycan tərəfindən inşa olunacaq bu abidə qəhrəman Azərbaycan övladlarının xatirəsini uğruna can verdikləri torpaqlarda ölümsüzləşdirəcəkdir”.
ÇDGTBBİ rəisi İ.Kaşdemir çıxışında dərin məna daşıyan bu abidənin təməlinin atılmasının tarixi əhəmiyyət daşıdığını qeyd edib. O, abidənin Azərbaycan-Türkiyə birliyinin önəmli simvollarından biri olacağını vurğulayıb.
Bildirilib ki, Çanakkale Savaşları Gelibolu Tarixi Sahəsində ayrılmış ərazidə təməli qoyulan Azərbaycan Şəhidləri Abidəsi Çanakkale Şəhidlər Abidəsinə 500 metr məsafədə yerləşir və Azərbaycan şəhidləri üçün ayrılan ərazi ümumilikdə 1960 metr kvadrat ərazini əhatə edir.
Çıxışların ardınca günün xatirəsinə hazırlanmış məktub səfir Rəşad Məmmədov, Çanakkale valisi İlhami Aktaş və ÇDGTBBİ rəisi İsmayıl Kaşdemir tərəfindən imzalanıb və abidənin təməlinə yerləşdirilib.
Mərasim abidənin təməlinin atılması ilə başa çatıb.
Məlumatda o da qeyd edilib ki, 24 aprel 2015-ci il tarixində Çanakkale döyüşlərinin 100-cü ildönümü münasibətilə Çanakkale Şəhidliyi Kompleksində keçirilmiş xatirə tədbirində iştirak edən Azərbaycan Prezidenti İlham Əliyev komplekslə tanışlıq zamanı Çanakkale döyüşlərində şəhid olmuş azərbaycanlı döyüşçülərin xatirəsinin Çanakkale Şəhidliyi Kompeksində əbədiləşdirilməsinə dair Azərbaycanın müvafiq dövlət qurumlarına göstəriş vermişdir.
Abidə layihəsinin eskizi Prezident İlham Əliyevin tapşırığı ilə azərbaycanlı heykəltəraşlar tərəfindən hazırlanıb.
Heykəltəraş Tural Rzaquliyevin layihəsinə əsasən, Bakıda hazırlanacaq və milli ornamentlərin əks olunacağı 1800×1900 mm ölçülü bürünc barelyefdə çiyin çiyinə vuruşan Azərbaycan və Türkiyə əsgərləri təsvir ediləcək. Barelyef 3 metr yüksəkliyindəki postament üzərinə yerləşdiriləcək və abidə onu tamamlayacaq sütunla birlikdə ümumi 13 metr hündürlükdə olacaq.
