BAYRAQDAR MEDİA – “Azad İran” Telegram kanalı dekabrın 13-də bildirib ki, Ermənistanın Tehrandakı səfiri ölkəsinin ərazisindən keçmək üçün heç bir ölkəyə dəhliz verməyəcəyini iddia edib.
Kanal İranın “Tasnim News” agentliyinə istinadla səfir Arsen Avakyanın belə bir iddia irəli sürdüyünü bildirib.
“İşğalçı Ermənistanın Tehrandakı səfiri Azərbaycanın irəli sürdüyü Zəngəzur dəhlizi ideyasından söz açaraq, bununla bağlı tərəflər arasında hər hansı sənədin imzalanmadığını iddia edib”, – deyə “Azad İran” bildirir.
Kanal daha sonra səfirdən belə bir sitat da paylaşıb: “Ermənistan tərəfi dəfələrlə bəyan edib ki, heç bir ölkəyə öz ərazisində hər hansı marşrut verməyəcək”.
Bir qədər də irəli gedən Ermənistan səfiri “bölgənin son iki il – 44 günlük Qarabağ savaşından sonrakı xüsusi vəziyyətinə toxunaraq, bu mərhələni aşmaq üçün Tehran-İrəvan əməkdaşlığının vacibliyini vurğulayıb. O, habelə iki ölkə arasında münasibətlərin son vəziyyəti, Güney Qafqaz regionunun vəziyyəti, Ermənistan, Azərbaycan və Türkiyə arasında sülh danışıqları prosesinə toxunub”.
