BAYRAQDAR MEDİA – Dekabrın 11-də Azərbaycan Yazıçılar Birliyi Quba Bölməsinin Rayon Mərkəzləşdirilmiş Kitabxana Sistemi ilə birlikdə tədbiri keçirilib. Tədbirdə Bölmənin 2022-ci ildəki ədəbi fəaliyyətinin yekunları və qarşıda duran vəzifələri barədə hesabatı dinlənilib. Eyni zamanda AYB üzvü, qubalı şair Zülfüqar Qalaxudatlının Vətən Müharibəsi Qəhrəmanı Mehrab Niftəliyevə həsr etdiyi “Şimal Qartalı” və digər kitablarının təqdimatı olub.
Xəbəri dekabrın 13-də Bölmənin rəhbəri, tanınmış şair Ramiz Qusarçaylı paylaşıb.
Xəbərdə deyilir ki, “AYB Quba Bölməsinin sədri, Əhməd Cavad və Ziya Paşa mükafatları laureatı, şair Ramiz Qusarçaylı açılış sözündə iştirakçıları dekabrın 12-də anım günü qeyd olunan ümummilli lider Heydər Əliyevin, şəhidlərimizin ruhunu yad etmək üçün sayğı duruşuna dəvət edib. Eyni zamanda ötən həftə dünyasını dəyişmiş AYB və “Ay İşığı” Ədəbi Məclisinin üzvü, “Şuşa fəryadları” adlı şeir kitabının müəllifi Zərifə xanımın xatirəsi də sayğıyla yad edilib”.
Bunun ardından şair Z.Qalaxudatlı çıxış edib, “Terminator” ləqəbli Vətən savaşı qəhrəmanı Mehrabın döyüş yolu və misilsiz şücaətindən danışıb, gələcək yaradıcılıq planları barədə məlumat verib.
Bölmənin və bölgədə fəaliyyət göstərən ədəbi məclislərin üzvlərinin iştirakı ilə keçirilən tədbirdə qəhrəman Mehrab Niftəliyevin ata-anası, qardaşı və qohumları da iştirak edib.
“Qəhrəmanın atası Söhrab müəllim, anası Xalidə müəllim, qardaşı Mərahim, yaxın qohumu Sadıq çıxış edərək tədbirin təşkilatçılarına və müəllifə təşəkkür bildirib, Mehrab haqqında xatirələrini danışıb”, – deyə xəbərdə bildirilir.
Quba MKS-nin direktoru Saməddin Nəsirov belə tədbirlərin əhəmiyyətindən geniş şəkildə bəhs edərək xalqın qəhrəman oğlu, şəhid Mehrabın valideynlərinə səbir diləməklə müəllifə təşəkkür edib.
“Qubadakı “Gülüstan” Ədəbi Məclisinin sədri Şıxəmməd Seyidməmmədov, Xaçmazın “Ulduzlar” Ədəbi Məclisinin sədri Fərzalı Ziyanur, Xudatdakı “Söz İşığında” Ədəbi Məclisinin sədri Səyyad Sərraf, Qusardan AYB üzvü, şair Ceyhun Ağabəyli, Qalaxudat kənd məktəbinin direktoru Fəxrəddin müəllim, AYB üzvlərindən Səbuhi Hacıxanlı, Məhbubə Hidayətqızı, Ayaz Səlimxanoğlu, eləcə də şair və yazıçılardan Sərvinaz Sərvər, Namik Xınalıqlı, Sahib Məmmədov, Mövlud Ağamməd, Asvar Tufandağlı, Rizvan Qiblədağlı, Mikayıl Bədəlov, Asif Fərəməzov, tədqiqatçı jurnalist Füzuli Baratov və başqaları çıxış edərək şəhid valideynlərinə səbir diləmiş, müəllifə uğurlar arzulamışlar.” Bu sözlər də xəbərdə yer alıb.
Sonda R.Qusarçaylı qəhrəmanın valideynlərinə, müəllifə və Quba MKS-nin direktoru S.Nəsirova təşəkkür edib, hər kəsə qarşıdan gələn yeni təqvim ilində uğurlar diləyib.
