Lamiyə İSAZADƏ – “Kimsəsiz Uşaqların Sosial Müdafiəsi” İctimai Birliyinin sədri
BAYRAQDAR MEDİA – Dünən səhər saatlarından Xankəndiyə gedən yolu bağlayaraq ermənilərin törətdiyi ekoterrora etiraz edən vətəndaş cəmiyyəti mübarizlərinin, jurnalistlərin, ictimai fəalların göstərdikləri əzmkarlıq və iradə, cəsarət və güc, xalq-iqtidar birliyi bütün dünyaya nümunə olmalıdır.
Azərbaycanda vətəndaş cəmiyyəti hər zaman dövlətin və dövlətçiliyin yanında olub. Bunun bariz nümunəsi olaraq isə bu gün Xankəndi-Şuşa yolunda Qarabağ iqtisadi rayonunda ekoloji terrora son qoyulması tələbi ilə etiraz aksiyası keçirən vətəndaş cəmiyyətinin nümayəndələrini göstərmək olar.
Laçın yolunda aksiya da, etirazçılara dəstək də davam edir – FOTOLAR
Vətəndaş deyərkən, sözün əsas kökü Vətəni ifadə edir. Bu gün Vətən torpağının hələ də düşmən tapdağında olan kiçik bir hissəsi üçün özünü soyuqda, boranda küçələrə atan, gecə yuxusuz qalan, canlarını təhlükəyə atan vətəndaş cəmiyyətinə böyük alqış düşür.
Həmin etiraz aksiyasında hər şey baş verə bilər. Bizim nümayəndə heyətinə qarşı təxribat da törədilə bilər. Axı təxribat və terrorçuluq erməninin xislətində var. Bütün bu təhlükələri gözə alıb erməni terrorçularının, əlisilahlı “sülhməramlıların” qarşısına əliyalın çıxan vətəndaş cəmiyyəti mübarizlərimizlə hər birimiz qürur duymalıyıq. Əminəm ki, dövlətimiz də bu cür cəsarətli, fədakar vətəndaş cəmiyyətinə sahib olduğu üçün qürurludur.
Azərbaycanlı fəalların Laçın yolundakı aksiyası davam edir – VİDEO
Rusiya sülhməramlılarının rəhbəri-general Andrey Volkova gəldikdə isə o, Azərbaycan vətəndaş cəmiyyətinin nümayəndələri ilə üz-üzə gəlməkdən, onların haqlı suallarını cavablandırmaqdan ona görə yayınır ki, sülhməramlı missiyanın mahiyyəti və məramı onlar tərəfindən birmənalı olaraq düzgün aparılmır. Onların işi xalqımıza ancaq süni şəkildə maneələr yaratmaqdır. A.Volkovun başçılıq etdiyi sülhməramlı dəstəsi əgər öz işlərini düzgün aparıb öhdəliklərinə düşən missiyanı düzgün icra etsəydi, bu saata qədər o, Azərbaycan ekoloqlarının və KİV nümayəndələrinin qarşısına çıxıb onların suallarını təmkinlə, layiqincə cavablandırardı.
Qaçıb gizlənmələri, səssiz qalmaları onların saxtakarlığını bir daha təsdiq edir. Ölkəmizin təbii sərvətlərinin qanunsuz istismarını, ekoloji terror cinayətlərini törətməkdə davam edən erməni bölücü rejimi və onların xaricdə yaşayan cinayət ortaqları bütün bunları Rusiya sülhməramlılarının məskunlaşdığı ərazidə həyata keçirir və A.Volkovun “sülməramlı” adı altında gizlənən dəstəsi isə, əslində, həmin cinayətkarların qanunsuz əməllərinə göz yumur.
Qanunsuz əmrləri yerinə yetirən A.Volkov ortaya çıxıb Azərbaycan cəmiyyətini düşündürən bütün sualları bir-bir cavablandırmalıdır. Əks təqdirdə etiraz aksiyasının günlərcə davam edəcəyi gözlənilir və aksiya iştirakçılarının sayı hər ötən gün artmağa davam edəcəkdir. Vətəndaş cəmiyyətinin keçirdiyi bu etiraz aksiyasında öz haqlı mövqeyinə nail olacağı şübhəsizdir.
