BAYRAQDAR MEDİA – Prezident İlham Əliyev dekabrın 8-də Azərbaycanda səfərdə olan Albaniya Baş naziri Edi Rama ilə təkbətək görüşüb.
Rəsmi foto çəkdirildikdən sonra qonağı salamlayan Azərbaycan Prezidenti deyib: “Xoş gəlmisiniz. Sizi bir daha görməyimə çox şadam. Əvvəla, Albaniyaya səfərim zamanı mənə göstərdiyiniz qonaqpərvərliyə görə Sizə təşəkkür edirəm. Razılığa gəldiyimiz kimi, biz fəal dialoqu davam etdirəcəyik. Sizin səfəriniz artıq razılaşdırılmış məsələlərin gedişatını izləmək xarakteri daşıyır. Hər iki tərəfdən bütün tapşırıqlar verilib. Heyətlərimiz fəal şəkildə işləyirlər. Mənim rəsmi səfərimin nəticələri olduqca müsbətdir. Bizim əlaqələrimiz güclənir və yeni imkanlar yaranır. Sizə məlumat verdiyim kimi, biz Tiranada səfirlik açırıq və bu da əməkdaşlığımızın vacib bir əlamətidir. Praktiki nöqteyi-nəzərdən bu, bizə ölkənizdə gedən proseslərlə daha yaxından tanış olmaq imkanı verəcək. Eyni zamanda, bu, bizə ikitərəfli gündəliyimizdə daha da səmərəli olmağa imkan yaradacaq. Bir daha xoş gəlmisiniz”.
Xəbəri Prezidentin Mətbuat xidməti yayıb.
Xəbərdə daha sonra deyilir ki, E.Rama Prezidentə təşəkkür edib, məmnuniyyətini dilə gətirib: “Təşəkkür edirəm, cənab Prezident. Bu, mənim üçün şərəfdir. Mən də təşəkkürümü ifadə etmək istəyirəm. İcazə verin deyim ki, məsələlərin gedişatı ilə bağlı təəssüratım heyrətamizdir. İndi ölkəmizdə Azərbaycan səfirliyinin açılması çox vacib bir məsələdir. Qalan digər məsələlərə gəldikdə isə, Siz dediyiniz kimi, biz işi davam etdirməliyik. Təşəkkür edirəm”.
Sonra İ.Əliyev və E.Rama işçi səhər yeməyi əsnasında geniş tərkibdə görüş keçirib. Ardından da dövlət başçısı Heydər Əliyev Fondunun vitse-prezidenti Leyla Əliyevanın çəkdiyi rəsm əsərini və Leyla Əliyevanın əsərlərinin kataloqunu qonağa hədiyyə edib.
