BAYRAQDAR MEDİA – Xeyli müddətdir Azərbaycanın kabel yayımçılarının qardaş türk dövlətlərinin TV kanallarını da öz paketlərinə əlavə etməli olması haqqında təkliflə çıxış edirik. Amma təəssüflər olsun ki, heç bir yayımçı Türkiyə dışında hansısa türk ölkəsinə aid kanalı öz abunəçilərinə təqdim etmir. Bunun yerinə isə işi-gücü anti-Azərbaycan təbliğatı olan Rusiya kanalları evimizə qədər gətirilir. Hələ buna görə abunəçilərdən pul da alınır.
Lakin belə anlaşılır ki, artıq buzlar əriməyə başlayıb. Bugünlərdə bəlli olub ki, KATV1 kabel yayımçısı qardaş Qırğızıstanın Piramida TV kanalını öz paketinə əlavə edib.
Bu haqda xəbəri Piramida TV-nin Azərbaycandakı təmsilçisi Ramiz Məşədihəsənli öz sosial media hesabında paylaşıb.
TV kanalın özü də məsələ ilə bağlı reportaj təqdim edərək artıq qardaş Azərbaycanda da yayıma keçdiklərinin xəbərini verib.
Nə deyirik ki? Xeyirli-uğurlu olsun və ardı gəlsin. Bir daha təkrar edirik: Rusiyanın Azərbaycana kin qusan bütün kanallarını kabel yayımçılarımız paketdən çıxarıb yerinə qardaş türk ellərindən kanallar əlavə edərsə, çox uyğun olar. Əks təqdirdə Azərbaycan vətəndaşına anti-Azərbaycan təbliğatı sırımağın adı çox ağırdır…
