Son yeniləmə: 28 Noyabr 2022 12:41
Dr. İçim Çağıner Kavuklu: Günəş bizim mübarizəmiz, su azadlığımızdır. Ancaq torpaq olmazsa, bu ikisinin də əhəmiyyəti olmaz
BAYRAQDAR MEDİA – “Bir çobanyastığını düşünün. Həmin çobanyastığının yaşaya bilməsi üçün nəyə ehtiyacı var? Təbii ki, günəşə, suya və ən əsası torpağa. Biz insanlar da beləyik. Yaşamağımız üçün gün işiğına, suya və torpağa ehtiyacımız var”.
Bunu BAYRAQDAR MEDİA-ya ötən həftə Kuzey Kıbrıs Türk Cümhuriyyətindən Azərbaycana səfər edən Kıbrıs Türk Girişimçi Qadınlar Dərnəyinin (GİKAD) başqanı Dr. İçim Çağıner Kavuklu deyib.
İki il öncə 44 günlük Vətən müharibəsində Azərbaycanın əldə etdiyi tarixi Zəfəri dəyərləndirən Dr. İçim Çağıner Kavuklu deyib ki, toprağın işğaldan azad edilməsi ən müqəddəs, ən qiymətli qələbədir: “Günəş bizim mübarizəmiz, su azadlığımızdır. Ancaq torpaq olmazsa bu ikisinin də əhəmiyyəti olmaz. Torpaqsız yaşamağımız mümkün deyil. Necə ki, o çobanyastığı, o çiçək torpaqsız yaşaya bilməz, biz insanlar da torpaqsız yaşaya bilmərik. Ona görə də Azərbaycanın bu misilsiz qələbəsinin dəyəri yoxdur”.
“Biz də Kıbrısda uzun illər bu mübarizəni apardıq. Torpaqlarımıza sahib çıxdıq. İki il öncə Qarabağın və digər ərazilərin işğaldan azad edilməsi bizim üçün də bir milli mücadilədə qalib gəlmək qədər qürurvericidir. Türkiyənin mənəvi və siyasi dəstəyi ilə Azərbaycanın əldə etdi bu tarixi qələbə KKTC-də böyük sevinclə qarşılanmışdı. Qalib Azərbaycana səfər etmək ayrı bir xoşbəxtlikdir. İnşallah, Azərbaycana növbəti səfərimdə Şuşaya getmək istəyirəm. Bu dəfə səfər proqramımız çox sıx olduğu üçün gedə bilmədik. Növbəti səfərimizdə Qarabağda görüşərik”, – deyə GİKAD başqanı əlavə edib.
Məlumat üçün bildirək ki, Dr. İçim Çağıner Kavuklunun rəhbərlik etdiyi nümayəndə heyəti noyabrın 23-də Azərbaycanda Qadın Sahibkarlığının İnkişafı Assosiasiyasının təşkilatçılığı ilə Qlobal Sahibkarlıq Həftəsinə həsr edilmiş “Üfüqdə Yeni Fürsətlər: Qadın Sahibkarlara Yaşıl İşıq” adlı V Forumda iştirak üçün Bakıya səfər edib. Onunla yanaşı GİKAD İdarə Heyətinin üzvləri Özlem Özbekoğlu ve Berin Avunduk da Bakıda səfərdə olub.
Dr. İçim Çağıner Kavuklunun həm bu səfər, həm də digər məqamlardan bəhs edən BAYRAQDAR MEDİA üçün özəl müsahibəsini yaxın günlərdə oxucularımıza təqdim edəcəyik.
