BAYRAQDAR MEDİA – Kuzey Kıbrıs Türk Cümhuriyyətində bələdiyyə seçkiləri öncəsi bəzi partiyalarda siyasi gərginlik hökm sürür. Bu özünü Xalqın Partiyasında (HP) daha açıq büruzə verir.
Bu partiyada istefa dalğası yaşanır.
Məlumata görə, millət vəkilləri Ayşegül Baybars və Jalə Refik Rocers partiya sıralarında istefaları ilə bağlı bəyanat veriblər.
Millət vəkilləri bəyanatlarında xalqın daha ədalətli, demokratik, müasir idarəçiliyə, hüquq və qanunun qorunmasına nail olması üçün hər platformada mübarizə aparacaqlarını bildiriblər.
Açıqlamada, Kıbrıs türk siyasətində köklü bir dəyişiklik yaratmaq, xalqın iradəsinə əsaslanan yeni siyasət anlayışının ölkəyə hakim olması üçün ürəyində vətən sevgisi olan bir çox insanı ortaq zəminə gətirməyi bacaran HP-nin mövcud durumuna nəzər salınıb. HP-nin son zamanlar öz prinsip və məqsədlərindən uzaqlaşaraq, ölkə daxilində birlik və bütövlüyü təmin edə, cəmiyyətin xeyrinə siyasətlər həyata keçirə bilmədiyi vurğulanıb.
