Son yeniləmə: 23 Noyabr 2022 14:59
BAYRAQDAR MEDİA – Ağsu Suvarma Sistemləri İdarəsi 37 min 71 hektar suvarılan torpaq sahəsinə xidmət edir. Bu sahələrin suvarılması üçün 967 kilometr suvarma kanalından istifadə olunur. Bunun 64 kilometri beton kanallardır.
Bu barədə BAYRAQDAR MEDİA-ya noyabrın 23-də Meliorasiya və Su Təsərrüfatı Açıq Səhmdar Cəmiyyətinin nümayəndəsi Dilqəm Şərifov bildirib.
O, qeyd edib ki, hər il olduğu kimi, bu il də idarə tərəfindən kanalların beton üzlüyə alınması prosesi davam edir: “Hazırda rayonun əsas suvarma kanalı sayılan Maşın Qolu kanalında beton işləri həyata keçirilir. Uzunluğu 36 kilometrə yaxın olan bu kanalın son illər artıq 10 kilometri beton üzlüyə alınıb. Bu da kanalın xidməti ərazisində olan 10 min hektardan artıq əkin sahəsinin suvarılmasını yaxşılaşdırıb. 1980-ci ildən istifadəyə verilən Maşın Qolu kanalının beton örtüyü uzun illər istismar olunduğundan bəzi hissələri yararsız vəziyyətə düşmüşdü”.
Bildirilib ki, Ağsu Suvarma Sistemləri İdarəsi çay məcralarının təmizlənməsi, yaşayış və əkin sahələrinin sel sularından mühafizəsi üçün daş-beton bəndlərinin çəkilməsi və təmiri işlərini də həyata keçirir: “İdarənin balansında olan 6 min 7 yüz metr uzunluqda daş beton bənddən Ağsu çayda beş yüz metrdən artıq hissəsi təmir olunub. Ondan 100 paqonmetri əsaslı, 70 paqonmetri isə cari təmir edilib. Bundan başqa, çaylarda 95 min kubmetr məcra təmizləmə işləri görülüb, 49 ədəd hidrotexniki qurğu təmir olunub. Suvarma kanalları isə 650 min kubmetr həcmdə lildən təmizlənib, beton və nov kanallarda təmir işləri aparılıb. Ağsu rayonunda suvarma mənbələri Girdimançay, Ağsuçay, Yuxarı Şirvan Kanalı və Cavanşir su anbarıdır. Bu il Ağsu Suvarma Sistemləri İdarəsi tərəfindən rayon ərazisində əkilən kənd təsərrüfatı bitkiləri üç dəfə suvarılıb”.
