BAYRAQDAR MEDİA – Noyabrın 15-də Azərbaycan Mətbuat Şurası İdarə Heyətinin iclası keçirilib.
Qurumdan BAYRAQDAR MEDİA-ya verilən məlumata görə, Şuranın sədri R.Məcid qurumun ötən bir ay ərzində gördüyü işlər barədə danışıb.
Sədr bildirib ki, hesabat dövrünün ən mühüm hadisəsi oktyabrın 12-də MŞ ilə Medianın İnkişafı Agentliyi arasında imzalanmış Əməkdaşlıq Memorandumudur: “Bundan başqa Şuranın təşəbbüsü ilə sosial media və sosial şəbəkələrdəki populyar səhifə istifadəçiləri, Vətən müharibəsində iştirak etmiş jurnalistlər, Xüsusi Təyinatlı Qüvvələrin qaziləri, Medianın İnkişafı Agentliyi və Audiovizual Şura ilə birlikdə regional medianın inkişaf məsələlərinə dair Qubada şimal bölgəsində fəaliyyət göstərən kütləvi informasiya vasitələrinin təmsilçiləri ilə görüşlər, həmçinin “Elnur Əşrəfoğlu xatirələrdə” kitabının təqdimat mərasimi keçirilib. Qurumun Şikayətlər üzrə Komissiyasının və Beynəlxalq Əlaqələr Komissiyasının iclasları da təşkil edilib. Bundan başqa MŞ Şuşa Rayon İcra Hakimiyyəti ilə birgə “Şuşa” qəzetinin 90 illik yubileyini qeyd edib, tanınmış media qurumlarına əlamətdar günləri ilə əlaqədar təbriklər ünvanlayıb”.
Məlumata əsasən, R.Məcid onu da bildirib ki, uzun illər Şuranın icraçı katibi vəzifəsini Şəmsəddin Əliyev tutub: “O, Ş.Əliyevin bu vəzifədə səmərəli fəaliyyət göstərdiyi nəzərə alınaraq, Şuranın diplomu ilə təltif edildiyini diqqətə çatdırıb. Diplom ona təqdim olunub”.
İclasda İdarə Heyətinin üzvü Vüqar Rəhimzadə 2023-cü ilin Azərbaycanda “Heydər Əliyev ili” elan olunması ilə bağlı Şuranın görəcəyi işlərin əhəmiyyət daşıdığını vurğulayıb. O, mövcud istiqamətdə ayrıca tədbirlər planının hazırlanacağını və İH-nin növbəti iclasına təqdim ediləcəyini bildirib.
Qeyd edilib ki, iclasda MŞ-nin Şikayətlər üzrə Komissiyasının sədri Vüqar Zifəroğlu qurumun baxdığı şikayətlərlə bağlı məlumat verib: “O, bildirib ki, Komissiyanın müzakirəsinə çıxarılmış 6 şikayətdən 4-ü ilə bağlı qərar çıxarılması məqbul sayılıb. Qərar layihələri nəzərdən keçirildikdən sonra qəbul olunub. Bundan sonra Şuranın Beynəlxalq Əlaqələr Komissiyasının sədri Müşfiq Ələsgərlinin məlumatı dinlənilib. M.Ələsgərli Komissiyanın xəttilə ölkəmizdəki beynəlxalq təşkilatlarla əməkdaşlıq məsələlərinin prioritet olaraq müəyyənləşdirildiyini, bununla bağlı onlara müraciətlər ünvanlandığını vurğulayıb”.
İclasda ekstremal şəraitdə, kütləvi aksiya və tədbirlərdə, kriminal hadisələrin işıqlandırılması zamanı jurnalistlərin davranışlarına dair müzakirələr də aparılıb: “Bununla əlaqədar Şuranın Etika Komissiyasının sədri Qulu Məhərrəmli, İH üzvləri Əflatun Amaşov, Yadigar Məmmədli, Yeganə Hacıyeva fikirlərini bildiriblər. Çıxış edənlər media məkanımızdakı tendensiyaları diqqətdə saxlamağın ümumən cəmiyyətin maraq və mənafelərinin qorunmasına dəstək baxımından əhəmiyyətini qabardıblar. İclasda medianın cəmiyyəti formalaşdırdığı reallığına söykənilərək jurnalistlərlə etik prinsiplərin qorunması istiqamətində davamlı iş aparılmasının zəruriliyi önə çəkilib. Xüsusən bildirilib ki, tutduğu vəzifədən, ictimai statusundan və populyarlıq dərəcəsindən asılı olmayaraq, jurnalistlərin təqdimatları cinayət əməlində təqsirləndirilən şəxslərin kultlaşdırılmasına xidmət etməməlidir. Hazırda mövcud olan bu tendensiyanın ziyanlı tərəflərinə diqqət yetirilib”.
Xəbərdə vurğulanıb ki, iclasda Azərbaycan Respublikasının Vəkillər Kollegiyası və Mediasiya Şurası ilə əməkdaşlıq məsələlərinə dair MŞ İdarə Heyətinin üzvü Elçin Mirzəbəylinin məruzəsi dinlənilib: “E.Mirzəbəyli bununla bağlı təklifləri diqqətə çatdırıb. Təkliflər müsbət qiymətləndirilib və hər iki qurumla əməkdaşlıq üçün əsas götürülüb. Toplantıda MŞ-nin Media Subyektləri ilə Əlaqələr, həmçinin Sosial Media Təmsilçiləri ilə Əlaqələr komissiyalarının sədrləri də müəyyənləşib. Birinci komissiyaya İH üzvü Vüqar Rəhimzadənin, ikinci komissiyaya isə İH üzvü Hacıbəy Heydərlinin rəhbərlik etməsi məqbul sayılıb. İclasda Şuranın digər komissiyalarının tərkiblərinin komplektləşdirilməsi ətrafında da müzakirələr olub. Təklif edilib ki, Etika Komissiyasının tərkibinə nüfuzlu ictimaiyyət nümayəndələri də daxil olunsun. Bu baxımdan tanınmış jurnalist İlhamiyyə Rzanın komissiyada təmsilçiliyi məqbul qiymətləndirilib”.
Məlumata görə, bundan başqa iclasda “Xalq qəzeti”nin əməkdaşı, Əməkdar jurnalist Tahir Aydınoğlu MŞ Ahıl Jurnalistlər Məclisinin sədri, “Kür” qəzetinin baş redaktoru Əminə Yusifqızı sədrin müavini olaraq təsdiqlənib: “Vətən müharibəsində iştirak etmiş jurnalistlərlə işin əlaqələndirilməsi üçün “Təbib” qəzetinin baş redaktoru, Vətən müharibəsi iştirakçısı Məğrur Əliyevin koordinatorluğu irəli sürülüb və məqbul qiymətləndirilib. İclasda İH üzvü Yadigar Məmmədlinin Avropa Mətbuat Şuraları Alyansının Kiprdə keçirilmiş illik toplantısında iştirakına imkan verilməməsi, onun Kiprə buraxılmaması məsələsi üzərində də dayanılıb. Bildirilib ki, Avropa Mətbuat Şuraları Alyansı Avropanın media cameəsini əhatə edən kifayət qədər mötəbər təşkilatdır və onun iclaslarında iştirakın bütün detalları nəzərə alınmalıdır”.
