BAYRAQDAR MEDİA – Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələrinin VIII-XI sinif şagirdlərinin iştirakı ilə “Peşəkarlıq yolunda” layihəsi başlayıb.
Bu barədə BAYRAQDAR MEDİA-ya noyabrın 10-da qurumun mətbuat xidmətindən məlumat verilib.
Bildirilib ki, layihənin məqsədi təhsilalanların peşə və ixtisaslar üzrə tələb olunan bilik, bacarıq, səriştələr barədə məlumatlandırılması, maraq və qabiliyyətlərinə uyğun müvafiq ixtisas-peşə seçiminə yönəldilməsi, həmçinin müəllim və valideynlərin də bu istiqamətdə maarifləndirilməsindən ibarətdir.
Məlumata əsasən, layihə çərçivəsində şagirdlərin düzgün ixtisas və peşə seçimi, uğurlu karyera barədə məlumatlandırılması, məktəblərin müxtəlif ixtisaslara yiyələnmiş məzunları və müxtəlif peşə sahibləri olan valideynləri tərəfindən maarifləndirici görüşlərin keçirilməsi planlaşdırılır.
Həmçinin şagirdlərin universitetlər, peşə təhsili müəssisələri barədə məlumatlandırılması nəzərdə tutulub: “Bundan əlavə, müəllimlərin şagirdləri istiqamətləndirmələri məqsədilə peşə təhsili və müxtəlif peşələr barədə məlumatlılıq səviyyələrinin artırılması planlaşdırılıb. “Peşəkarlıq yolunda” layihəsi çərçivəsində ixtisaslı mütəxəssislər və müəllimlər tərəfindən valideynlərlə maarifləndirici görüşlər də təşkil olunacaq”.
Layihə çərçivəsində, həmçinin peşə təmayüllü siniflərin şagirdləri və peşə təhsili müəssisələrinin tələbələri ilə birgə maarifləndirici videosüjetlərin, təqdimatların hazırlanması və görüşlərdə nümayişi nəzərdə tutulub.
