BAYRAQDAR MEDİA – Belçika Krallığının Mons şəhərində NATO-nun Əməliyyat İmkanları Konsepsiyası (ƏİK) proqramı çərçivəsində illik konfrans keçirilib.
Bu buarədə Müdafiə Nazirliyindən məlumat verilib.
Bildirilib ki, konfrans NATO-nun müxtəlif qərargahlarından olan nümayəndələrin, eləcə də Azərbaycan Ordusunun hərbi qulluqçularının iştirakı ilə keçirilib: “Konfransda Azərbaycanın ƏİK proqramından geniş istifadə etdiyi və tərəfdaş dövlətlər arasında qabaqcıl təcrübəyə malik olduğu xüsusi vurğulanıb.
Qeyd edilib ki, Hərbi Dəniz Qüvvələrinin (HDQ) Ortaq Qüvvələr Birliyinə bəyan edilmiş “Dənizdə Qadağa Əməliyyatları üzrə Göyərtə Axtarış Qrupu” NATO-nun ƏİK proqramı çərçivəsində Türkiyədə keçirilən “Dənizdə Qadağa Əməliyyatları” üzrə “2-ci səviyyəli özünüqiymətləndirməsi təlimi”ndə (NEL-2) müvəffəqiyyətlə iştirak edərək “Döyüşə hazır” bölmə kimi qiymətləndirilib”.
Məlumata görə, uğurlu iştirakına görə Azərbaycanın hərbi qulluqçularına Alyansın səlahiyyətli nümayəndəsi tərəfindən “Döyüşə hazır” sertifikatı təqdim edilib.
