Son yeniləmə: 29 Oktyabr 2022 11:33
Azərbaycan Milli Komitəsi ICOMOS Baş Assambleyasının iclasına həmsədrlik edir
BAYRAQDAR MEDİA – Tailand Krallığının paytaxtı Banqkok şəhərində Abidələr və Tarixi Yerlər üzrə Beynəlxalq Şuranın (ICOMOS) Baş Assambleyası keçirilir. ICOMOS Azərbaycan Milli Komitəsinin həmsədrliyi ilə keçirilən tədbirin gündəliyində milli komitələrin fəaliyyəti ilə bağlı müzakirələr və yer alıb.
Bu barədə BAYRAQDAR MEDİA-ya oktyabrın 29-da Dövlət Turizm Agentliyindən məlumat verilib.
Bildirilib ki, dünyanın 100-ə yaxın ölkəsindən olan nümayəndələrin iştirak etdiyi Baş Assambleyanın toplantısında, həmçinin ICOMOS-un qarşıdakı dövr üçün fəaliyyət planı və büdcəsi müzakirə olunub.
Toplantıda gələn il Sidneydə keçiriləcək illik yığıncaqla bağlı da bəzi razılaşmalar əldə olunub.
Dövlət Turizm Agentliyinin tabeliyindəki Qoruqları İdarəetmə Mərkəzinin İdarə Heyəti sədrinin müavini Sədaqət Davudovanın başçılıq etdiyi ICOMOS Azərbaycan Milli Komitəsinin nümayəndə heyəti ilə digər ölkələrin təmsilçiləri arasında görüşlər keçirilib: “Görüşlərdə ICOMOS Azərbaycan Milli Komitəsinin digər milli komitələrlə qarşılıqlı əməkdaşlıq perspektivləri müzakirə olunub, birgə layihələrlə bağlı ilkin fikir mübadiləsi aparılıb. Qeyd edək ki, Dövlət Turizm Agentliyinin təşəbbüsü və dəstəyi ilə 2021-ci ildə yaradılan ICOMOS Azərbaycan Milli Komitəsi qurumun illik toplantısında ilk dəfə iştirak edir. Maddi-mədəni irsin qorunması üzrə dünyada nüfuzlu beynəlxalq təşkilat olan ICOMOS 1965-ci ildə təsis edilib. Baş qərargahı Fransanın Paris şəhərində yerləşən təşkilat UNESCO-nun Dünya İrs Mərkəzinin məşvərətçi orqanı olmaqla, maddi-mədəni irsin qorunması, memarlıq və arxeoloji abidələrin mühafizəsi sahəsində ixtisaslaşmış dünya miqyaslı qeyri-hökumət təşkilatıdır və ətrafında 10 mindən çox mütəxəssisi birləşdirir”.
