Son yeniləmə: 29 Oktyabr 2022 09:53
Qardaş ölkənin bu üç şəhərində Güneyin Bozqurdu Araz Elsəslə sazlı, sözlü görüş keçiriləcək
BAYRAQDAR MEDİA – Son vaxtlar İranda yaşanan hadisələr Güney Azərbaycan amilini yenidən aktuallaşdırıb. Lakin bəzi xarici güclər İran adlı ölkədə cərəyan edən hadisələrdə sanki Güney Azərbaycanı arxa plana keçirməyə çalışır.
Məhz buna görə də Türkiyədəki Azərbaycan diaspor təşkilatları maraqlı bir təşəbbüslə çıxış edib. Onlar Güney Azərbaycandan olan tanınmış el ozanı Araz Elsəsin Türkiyədə konsert və görüşlərini təşkil edəcəklər. Bu zaman Güney Azərbaycan barədə, orada fars-molla rejimi tərəfindən uzun illərdir türklərə edilən zülmlər haqqında həqiqətlər birbaşa A.Elsəs tərəfindən Türkiyə ictimaiyyətinə çatdırılacaq.
Qeyd edək ki, belə görüş-konsertin keçirilməsi təşəbbüsü Eskişehir Azərbaycanlılar Dərnəyindən gəlib. Daha sonra Antalya Azərbaycan Kültür və Dayanışma Dərnəyi, İzmir Azərbaycan Kültür Dərnəyi də bu təşəbbüsə dəstək verib.
Beləliklə, ilk konsert oktyabrın 28-də axşam Antalyada olacaq. Güneyin Bozqurdu ilə ikinci görüş oktyabrın 30-da Eskişehirdə, üçüncüsü isə noyabrın 1-də İzmirdə olacaq.
Hər üç görüş-konsert ödənişsizdir.
