BAYRAQDAR MEDİA – Oktyabrın 24-də Vaşinqtonda Azərbaycanın tanınmış şair və dramaturqu Hüseyn Cavidin barelyefinin açılışı olub.
Bu barədə BAYRAQDAR MEDİA-ya oktyabrın 26-da Azərbaycanın ABŞ-dakı səfirliyindən məlumat verilib.
Bildirilib ki, barelyef H.Cavidin 140 illik yubileyi münasibətilə açılıb: “Gənc heykəltəraş Kamran Əsədovun müəllifi olduğu xatirə barelyefi Vaşinqton şəhərinin tarixi Corctaun ərazisində yerləşən ABŞ-Azərbaycan Ticarət Palatasının inzibati binasının üzərinə vurulub. Layihə ABŞ-Azərbaycan Ticarət Palatası, Azərbaycanın ABŞ-dakı səfirliyi və Azərbaycanın Mədəniyyət Nazirliyinin birgə fəaliyyəti nəticəsində ərsəyə gəlib”.
Məlumata əsasən, açılış mərasimində ABŞ hökumət rəsmiləri, diplomatik korpusun təmsilçiləri, iş adamları və Azərbaycan icmasının nümayəndələri iştirak edib: “Tədbiri açılış sözü ilə başlayan ABŞ-Azərbaycan Ticarət Palatasının Direktorlar Şurasının sədri Reza Vəziri qonaqları salamlamış və barelyefin açılışının əhəmiyyətdən danışıb. Daha sonra Azərbaycanın ABŞ-dakı səfiri Xəzər İbrahim Hüseyn Cavid irsinin Azərbaycan tarixindəki rolundan bəhs edib. O, Hüseyn Cavidin azadlıq idealları uğrunda apardığı mübarizə yolundan, onun sürgün illərindən və daha sonra nəşinin ümummilli lider Heydər Əliyev tərəfindən Naxçıvana gətirilməsindən danışıb”.
Mərasimdə Vaşinqton şəhəri Kolumbiya Əyalətinin meri xanım Mariel Bauserin 24 oktyabr 2022-ci il tarixini Hüseyn Cavidin Anım Günü elan etməsi barədə bəyanatının mətni oxunub: “Bəyanatda Hüseyn Cavidin Azərbaycan ədəbiyyatındakı rolu ilə yanaşı onun azadlıq və ayrı-seçkiliyə qarşı aparmış olduğu mübarizə qeyd edilir. Həmçinin vurğulanır ki, Cavidinazad və ədalətli dünya idealları və onun ədalətsizlik və ayrı-seçkiliyə qarşı aparmış olduğu mübarizə çağdaş dünyamızda aktual olaraq qalmaqdadır”.
Tədbir çərçivəsində layihənin baş tutmasına, eyni zamanda ABŞ-Azərbaycan Ticarət Palatasının fəaliyyətinə vermiş olduqları dəstəyə görə bir neçə nəfərə xatirə lövhələri hədiyyə edilib.
