BAYRAQDAR MEDİA – Mexiko şəhərində yerləşən “La Ermita” Mədəniyyət Mərkəzində Azərbaycanın suverenliyi və ərazi bütövlüyü uğrunda şəhid olmuş qəhrəmanların xatirəsinə həsr olunmuş guşə yaradılıb.
Bu barədə BAYRAQDAR MEDİA-ya oktyabrən 25-də Azərbaycanın Meksikadakı səfirliyindən məlumat verilib.
Bildirilib ki, guşə Meksikanın ən əlamətdar milli günlərindən sayılan və vəfat etmiş insanları yad etmək üçün qeyd olunan “Ölülər Günü” çərçivəsində yaradılıb. Guşanın yaradılması Mexiko Şəhər hökumətinin təşəbbüsü və Azərbaycanın bu ölkədəki səfirliyinin dəstəyi ilə reallaşıb.
Məlumata əsasən, guşə iki gün ərzində şəhər sakinləri tərəfindən böyük maraqla ziyarət edilib: “Şəhid qəhrəmanlarımızın şəkillərinin yer aldığı xatirə guşəsi həm Azərbaycan, həm də Meksika mədəniyyətinə xas özəllikləri özündə ehtiva edib, “Ölülər Günü” ilə bağlı yerli Meksika adətləri ilə yanaşı, xalqımıza məxsus milli ornamentlərdən istifadə olunub”.
Qeyd edilib ki, tədbirin açılışında Azərbaycanın Meksikadakı səfiri Məmməd Talıbov da iştirak edib, iştirakçılara Azərbaycanın uzun illər boyu üzləşdiyi erməni təcavüzündən və Vətən müharibəsi dövründə qəhrəmanlarımızın şücaəti barədə məlumat verib.
