Son yeniləmə: 25 Oktyabr 2022 16:37
BAYRAQDAR MEDİA – Təhsil müəssisələrinin müəllim-şagird heyətinin partlayıcı hərbi sursat və mina təhlükəsinə dair maarifləndirilməsi ilə bağlı açıq dərslər keçirilir.
Bu barədə Bakı Şəhəri üzrə Təhsil İdarəsinin mətbuat xidmətindən (BŞTİ) məlumat verilib.
Bildirilib ki, mina təhlükəsinə qarşı növbəti açıq dərslər Nəsimi və Suraxanı rayonları üzrə 35 və 87 nömrəli tam orta məktəblərdə təşkil olunub: “Dərslərdə Təhsil Nazirliyinin əməkdaşları Rövşən Ağayev, Əhliyət Adıgözəlov, Fövqəladə Hallar Nazirliyinin kapitanı Ələkbər Ələkbərov, Mina Təmizləmə Agentliyinin əməkdaşı Ceyhun Quliyev, Bakı Şəhəri üzrə Təhsil İdarəsinin İnkişaf layihələri sektorunun müdiri Günay Qurbanova, Təlimə Dəstək Mərkəzinin metodisti Mürsəl Qurbanov, Vətən Müharibəsində iştirak edən qazilər, Gənclərin çağırışaqədərki hazırlığı (GÇH) rəhbərləri, şagirdlər və valideynlər iştirak ediblər. Açıq dərslərdə Gənclərin çağırışaqədərki hazırlığı rəhbərləri tərəfindən qəza zamanı göstərilən ilk tibbi yardım, minaların növləri, onların təhlükəsi və digər mövzular barədə məlumatlar əyani vəsaitlər və videoçarxlar vasitəsilə nümayiş olunur”.
Vurğulanıb ki, praktiki olaraq şagirdlərə mina partlayışı zamanı ilkin xilasetmə işləri öyrədilir: “Eyni zamanda, partlayıcı hərbi sursat və mina partlayışı nəticəsində yaralanmış qazilər partlayıcı qurğuların törətdiyi təhlükədən danışaraq bununla bağlı öz tövsiyələrini veriblər. Açıq dərslərin sonunda ANAMA tərəfindən hazırlanmış təlimat kitabçaları və partlayıcı sursatların təhlükəsinə dair təbliğat materialları olan maarifləndirici poster və bukletlər təqdim olunur. Qeyd edək ki, açıq dərslərin keçirilməsinin əsas məqsədi təhsil müəssisələrinin müəllim-şagird heyətinin diqqətini baş verə biləcək fövqəladə hallar zamanı davranış qaydalarının mənimsənilməsinə yönəltmək, onların partlayıcı hərbi sursat və mina təhlükəsinə qarşı bilik və bacarıqlarını təkmilləşdirməkdən ibarətdir”.
