Eskender Bariyev: Dünya Krım tatarlarının qanunsuz olaraq Rusiya ordusuna cəlb edilməsini dayandırmalıdır
BAYRAQDAR MEDİA – Rusiyanın Ukraynaya qarşı işğalçılıq siyasətinə etiraz hər keçən gün artır. Bununla bağlı daha bir etiraz isə Krım Tatar Resurs Mərkəzinin rəhbəri Eskender Bariyevdən gəlib.
Bu barədə Kırım Haber Ajansı məlumat yayıb.
Məlumata görə, E.Bariyev vurğulayıb ki, beynəlxalq ictimaiyyət Krımın yerli əhalisi olan Krım tatarlarının Rusiya ordusuna zorla cəlb edilməsinin qarşısını almaq üçün Rusiyaya təzyiqlərini artırmalıdır.
Qeyd edilir ki, o, bu çağırışı bu il ilk dəfə keçirilən Krım Platforması Parlament Sammitində edib. Xorvatiyada keçirilən tədbirdə çıxış edən E.Barıyev “Krım tatarlarının qeyri-qanuni olaraq Rusiya ordusuna çağırılması yerli əhali üçün əslində ölüm hökmüdür. Dünya bunun qarşısını almaq və Rusiyaya təzyiqləri gücləndirmək üçün əlində olan bütün mexanizmlərdən istifadə etməlidir”, – deyib.
Onun sözlərinə görə, Krımın yerli xalqlarının kişi əhalisinin BMT-nin üçüncü üzv dövlətlərinə təxliyəsi üçün humanitar dəhlizlərin yaradılması təşviq edilməlidir.
Ukrayna Prezidentinin Krımdakı daimi nümayəndəsi Tamila Taşeva da Rusiyanın Krım tatarlarını Ukraynaya qarşı döyüşməyə məcbur etdiyini bildirib: “Onlar səfərbərlikdən istifadə edərək Krım tatarlarını məhv etmək istəyirlər. Biz Rusiyanın növbəti cinayətini dünyaya elan etməliyik”.
