Mədəniyyət Nazirliyi “Rebuild Karabakh – 2022” sətgisində xüsusi stendlə təmsil edilir
BAYRAQDAR MEDİA – “Oktyabrın 19-da Bakı Ekspo Mərkəzində II Azərbaycan Beynəlxalq “Qarabağın bərpa, yenidənqurma və inkişafı” (“Rebuild Karabakh – 2022”), 27-ci Azərbaycan Beynəlxalq İnşaat (“BakuBuild”) və 14-cü Beynəlxalq İstilik, Havalandırma, Kondisionerləşdirilmə, Su təchizatı, Santexnika və Üzgüçülük Hovuzu (“Aquatherm Baku”) sərgilərini bir araya gətirən “Xəzər İnşaat Həftəsi” öz işinə başlayıb”.
Bu barədə Mədəniyyət Nazirliyindən məlumat verilib.
Qeyd edilib ki, üç gün davam edəcək “İnşaat həftəsi”nin “Rebuild Karabakh – 2022” sərgisində Mədəniyyət Nazirliyi xüsusi stendlə təmsil olunur: “Stenddə Qarabağ xalçası, Zəfər və Qarabağ mövzulu kitablar, Azərbaycan, ingilis və rus dillərində nəşr olunmuş “Şuşa – Azərbaycanın mədəniyyət paytaxtı” kataloqu, eləcə də əl işləri və suvenirlər, işğaldan azad edilmiş torpaqlarımızı 360 dərəcə səyahət etmək üçün virtual eynək sərgilənir”.
Məlumata əsasən, Nazirliyin stendində, həmçinin Ağdamda yaradılacaq İşğal və Zəfər muzeyləri, Füzuli Memorial Kompleksinin maketləri nümayiş etdirilir: “Monitorda isə işğaldan azad edilmiş rayonlarımızda görülən və görüləcək işlər barədə tanıtım filmləri iştirakçılara nümayiş olunur. Mədəniyyət Nazirliyinin stendinə yaxınlaşan qonaqlar, eyni zamanda, muğam üçlüyünün – Elbrus Məmmədyarov (tar), Bayram Əliyev (kamança), Aydan Həmzəyeva (xanəndə) ifasında təqdim olunan muğam və xalq mahnılarımızı dinləyirlər”.
