Son yeniləmə: 17 Oktyabr 2022 09:11
Menderes Demir: Məqsədimiz türk mədəniyyətini geniş kütlələrin diqqətinə çatdırmaqdır
BAYRAQDAR MEDİA – 7-ci Türk Dünyası Sənədli Filmlər Festivalı uğurla başa çatıb. Festival Türk Dünyası Jurnalistlər Federasiyasının rəhbərliyi və Türk Dünyası Mədəniyyət, İncəsənət və Kino Fondu ilə əməkdaşlıq çərçivəsində təşkil edilib. Festivalın keçirilməsinə Türkiyə Mədəniyyət və Turizm Nazirliyi və Türk Dünyası Bələdiyyələr Birliyi dəstək verib.
Bır sıra qurumların da ortaqlığı ilə keçirilən festivalın Gala gecəsi oktyabrın 14-də olub. Bununla bağlı məlumatda deyilir ki, “Fikirdə birlik” şüarı ilə keçirilən bu dəfəki festivalın ana xəttini “Türk mədəniyyəti və türkün dünyaya baxışı” mövzusu təşkil edib.
Festivalın qalibləri ilə yanaşı bir sıra yaradıcı insanlar da xüsusi mükafata layiq görülüb. Onlar arasında Azərbaycanın tanınmış kinorejissoru Oqtay Mirqasımov da var.
Türk Dünyası Jurnalistlər Federasiyasının sədri, Türk Dünyası Sənədli Filmlər Festivalı Təşkilat Komitəsinin sədri Menderes Demir festival çərçivəsində Kırım Haber Ajansına açıqlama verib.
Dünya türklərinin türk mədəniyyəti haqqında özləri tərəfindən təqdim edilən filmlərə önəm verdiklərini vurğulayan M.Demir deyib: “Türk Dünyası Jurnalistlər Federasiyası olaraq 7 ildir keçirdiyimiz bu festivalın məqsədi türk dünyasına, türk mədəniyyətinə xidmətdir. Elə müsabiqəyə də bu tipli filmləri qəbul edirik. Burada məqsədimiz türk mədəniyyətini geniş kütlələrin diqqətinə çatdırmaqdır. Festivalımıza Krım, Doğu Türküstan və Kərkükdəki türk qardaşlarımızın problemləri, çətinlikləri, mədəniyyəti haqqında çəkilmiş filmləri qəbul edirik”.
Bildirilib ki, festivalda iştirak edən və mükafat qazanan filmlər noyabrın sonuna qədər Türkiyə, Azərbaycan, Qazaxıstan, Qırğızıstan, Özbəkistan, Quzey Makedoniya, Bosniya və Herseqovina, Macarıstan və Kuzey Kıbrıs Türk Cümhuriyyətində keçiriləcək müxtəlif tədbirlərdə nümayiş etdiriləcək.
