Ankara Univeristetində 18 oktyabr – Müstəqilliyin bərpası günü və Şuşa ilinə həsr olunmuş tədbir keçirilib
BAYRAQDAR MEDİA – Türkiyənin ən tanınmış univeristetlərindən biri olan Ankara Univeristetində 18 oktyabr – Müstəqilliyin bərpası günü və Şuşa ilinə həsr olunmuş tədbir keçirilib.
Bu barədə BAYRAQDAR MEDİA-ya Azərbaycanın Türkiyədəki səfirliyindən məlumat verilib.
Bildirilib ki, səfirliyin və Ankara Universitetinin birgə təşkilatçılığı, universitetin pedaqoji heyəti və tələbələrinin iştirakı ilə keçirilən tədbirdən öncə foyedə “Qarabağın mirvarisi Şuşa” sərgisinin açılışı həyata keçirilib. Səfir Rəşad Məmmədov sərgidə nümayiş olunan şəkillər barədə tələbələrə ətraflı məlumat verib.
Qeyd edilib ki, mərasim Azərbaycanın ərazi bütövlüyü uğrunda həyatını fəda etmiş şəhidlərin xatirəsinə 1 dəqiqəlik sükut və Azərbaycan və Türkiyənin dövlət himnləri ilə başlayıb: “İştirakçılara Şuşaya həsr olunmuş qısa film nümayiş etdirilib və Universitetdə təhsil alan azərbaycanlı tələbələrin iştirakı ilə Azərbaycan musiqiləri təqdim olunub. 2022-ci ildə ali məktəbə keçirilmiş qəbul imtahanlarında ən yüksək – 700 bal toplayaraq Azərbaycan birincisi olmuş və hazırda Ankara Universiteti tibb fakültəsində təhsil almaqda olan Nigar Ağazadə azərbaycanlı tələbələr adından çıxış edərək, bütün vətənpərvər gənclərin yenidən müstəqilliyini qazanmış ölkəmizin rifahı naminə çalışmağa hazır olduğunu bildirib”.
Məlumata əsasən, Ankara Universitetinin rektoru Necdet Ünüvar çıxışında Türkiyənin hər zaman Azərbaycanla bərabər olduğunu, bu qardaşlığın əbədiyyətə qədər davam edəcəyini vurğulayıb: “Azərbaycanın Türkiyədəki səfiri Rəşad Məmmədov ölkəmizin müstəqillik tarixi barədə geniş çıxış edərək, müstəqilliyin yenidən qazanılmasından sonra keçən 31 il ərzində Azərbaycanın əldə etdiyi nailiyyətləri xüsusi qeyd edib və Azərbaycan-Türkiyə əlaqələrinin əhəmiyyətinə diqqət çəkib”.
Tədbirin sonunda səfir universitet tələbələrinin çoxsaylı suallarını cavablandırıb və xatirə şəkilləri çəkdirib.
