BAYRAQDAR MEDİA – 1991-2002-ci illərdə Eskişehirdən millət vəkili olmuş keçmiş dövlət naziri İbrahim Yaşar Dedelek maraqlı bir açıqlama verib. O, Eskişehirin 1994-cü ildə Böyükşəhər Bələdiyyəsi statusunu necə qazandığını açıqlayıb.
Məlumata görə, İ.Y.Dedelek eskisehir.net-in canlı yayımında Sedef Media Qrupunun prezidenti Cihan Yıldırımın qonağı olub. O, Eskişehirin 1994-cü ildə Böyükşəhər Bələdiyyəsi statusunu necə qazandığını belə izah edib: “Demir Berberoğlu İl Başçısı, mən, Fevzi Yalçın və Hüsamettin Cindoruk Eskişehirdən millət vəkili. Qəfildən Hüsamettin bəylə Süleyman Demirelin münasibəti korlandı. Bu arada Hüsamettin bəy bizə zəng etdi. Dedi ki, uşaqlar, böyükşəhər elan ediləcək. Bəlli oldu ki, Eskişehir o siyahıda yoxdur”.
Beləliklə, H.Cindoruk özünün S.Demirellə münasibətinin gərgin olduğunu deyərək, bu məsələdə yardım üçün onların işə girişməsini istəyib. Onlar növbəti gün səhər erkən S.Demirelin qaldığı Güniz Sokakdakı məlum ünvanda olublar.
Səhər yeməyi əsnasında onlar S.Demireldən Eskişehirin böyükşəhər, metropol statusu almasına dəstək verməyi xahiş ediblər. Məsələ burasındadır ki, Böyükşəhər statusu almaq üçün həmin şəhərin əhalisinin 500 min nəfər olması vacib idi. O zaman isə Eskişehirin əhalisi 420 min imiş.
S.Demirel həmin vaxt daxili işlər naziri olan İsmet Sezgine zəng edərək deyir: “İsmet, Eskişehirin əhalisi nə qədərdir?”
Nazirin “420 min” cavabını eşidincə S.Demirel deyir: “Qardaşım İsmət, 10 ildir siyahıyaalınma aparılmır. Məncə bu şəhərin əhalisi artıq 500 mindir, sən Eskişehiri böyükşəhər et. Beləliklə də Eskişehirə böyükşəhər statusu verilir”.
