Vüqar Bayramov: Aparılan monitorinq və rəsmi statistika göstərir ki, kommersiya bankları daha çox Bakıda kreditləşmədə maraqlıdırlar
BAYRAQDAR MEDİA – “Bütövlükdə bu gün aparılan monitorinq və rəsmi statistika göstərir ki, kommersiya bankları daha çox Bakıda kreditləşmədə maraqlıdırlar. Nəticədə bu gün ümumi kredit portfelinin 80 faizi paytaxtın payına düşür”.
Bunu BAYRAQDAR MEDİA-ya açıqlamasında Milli Məclisin deputatı Vüqar Bayramov deyib.
Xatırladaq ki, hazırda Azərbaycanda regionlarda yaşayan sakinlər kreditlə bağlı bir problemlə üzləşirlər. Əksər hallarda rayonlarda yaşayanlar öz evini, yaxud minik vasitəsini girov qoyaraq kredit götürmək istəyəndə, bankların yerli filialları onlara mənfi cavab verir.
Bölgələr bankların ayırdığı kreditin cəmi 17 faizinə sahib ola bilirlər
Bununla bağlı vəziyyəti dəyərləndirən millət vəkili deyib ki, hətta Abşeronu da nəzərə alsaq digər bölgələr bankların ayırdığı kreditin cəmi 17 faizinə sahib ola bilirlər: “Bu isə o anlama gəlir ki, banklar tərəfindən ayrılan hər 100 manat kreditin cəmi 17 manatı regionların payına düşür. Bu da təbii ki, öz növbəsində regionlarda yaşayan əhalinin kreditə çıxış imkanlarında çətinliklər yaradır”.
Girov mexanizmi təkmilləşdirilsin
“Bəs vəziyyətdən çıxış yolu kimi hansı addımlar atıla bilər” sualına gəlincə deputat bildirib: “Təklif edirik ki, girov mexanizminin təkmilləşdirilməsi ilə bağlı fəaliyyətlər genişləndirilsin. Çünki əsas səbəblərdən biri bölgələrdə olan əmlakın girov kimi qəbul edilə bilinməməsidir. Bankların da arqumenti ondan ibarətdir ki, həmin girovu kredit qaytarılmayanda satmaqda çətinlik çəkirlər. Bu kontekstdən daha məqsədəuyğun olardı ki, dediyim kimi, girov mexanizmi təkmilləşdirilsin və ümumiyyətlə kreditlər verilən zaman girova yeni baxışın tətbiq olunması mümkün olsun”.
V.Bayramovun sözlərinə görə, bu da nəticə etıbarı ilə regionlarda olan sahibkarların, eləcə də vətəndaşların kreditlərə çıxış imkanlarını artıra bilər: “Yəni sahibkarların, eləcə də regionlarda yaşayan vətəndaşların kreditə əlçatanlığına mane olan ciddi məsələlərdən biri məhz girovlarla bağlıdır. İqtisadiyyat Nazirliyi tərəfindən güzəştli kreditlərlə bağlı təkmilləşdirilmiş girov mexanizmi var. Alınan avadanlıqların özünün girov olması kimi mexanizmlər var. Düşünürəm ki, bölgələrdə vətəndaşların kreditlərə çıxış imkanlarını artırmaq üçün oxşar mexanizmlərin tətbiqinə ehtiyac var”.
