Son yeniləmə: 29 Sentyabr 2022 09:58
BAYRAQDAR MEDİA – “Məlumat üçün qeyd edək ki, 15-27 sentyabr 2022-ci il tarixlərində Abşeron dairəvi dəmir yolu xətti üzrə həftəiçi ortalama gündəlik 23 min 104 nəfər sərnişin daşınıb, bunun 81 faizini Bakı-Pirşağı-Sumqayıt istiqaməti üzrə, 19 faizini Bakı-Xırdalan-Sumqayıt istiqaməti üzrə sərnişindaşıma təşkil edib”.
Bu barədə “Azərbaycan Dəmir Yolları” QSC-nin ADY-dən Abşeron dairəvi dəmir yolu xətti üzrə Sumqayıt-Xırdalan-Bakı istiqamətində saat 07:45 qatarının Sumqayıt-Pirşağı-Bakı istiqamətinə yönləndirilməsi ilə bağlı açıqlamasında qeyd olunub.
Qurumun mətbuat xidmətindən BAYRAQDAR MEDİA-ya daxil olan açıqlamda bildirilib ki, hazırda hər iki istiqamət üzrə sərnişin sıxlığı müşahidə olunsa da, Sumqayıt-Pirşağı-Bakı istiqaməti üzrə sıxlıq daha çox olduğundan Sumqayıt-Xırdalan-Bakı istiqamətində saat 07:45 qatarı Sumqayıt-Pirşağı-Bakı istiqamətinə yönləndirilib: “Xatırladaq ki, hazırda “Azərbaycan Dəmir Yolları” QSC-nin mövcud qatar parkında 9 ədəd elektrik qatarı mövcuddur. Bunlardan 1-i Bakı-Gəncə istiqamətində, 7-si Bakı-Sumqayıt istiqamətində hərəkətdədir. 1 qatar isə ehtiyat qatar kimi saxlanılır və texniki baxışa göndərilən qatarın əvəzinə xəttə buraxılır. Qeyd edək ki, hazırda Abşeron dairəvi dəmir yolu xətti üzrə qatarlar mövcud qatar parkının sayına uyğun olaraq ən qısa intervalla işləyir. Sərnişin sıxlığı nəzərə alınaraq, yeni qatarların alınması istiqamətində işlər aparılır”.
