Dr. Yücel Karauz: İki il öncə qəhrəman Azərbaycan övladları öz qanları ilə şanlı tarix yazdılar
BAYRAQDAR MEDİA – “Şair deyir ki, “Bayraqları bayraq yapan üstündəki qandır; Torpaq, əgər uğrunda ölən varsa Vatandır”. Bu gün 27 sentyabrdır. İki il öncə şanlı savaş – 44 günlük Vətən müharibəsinin başlandığı gündür. Mən həmin müharibədə canlarını fəda etmiş şəhidlərin timsalında Azərbaycanın haqq davası, azadlığı və torpaqlarının Ermənistanın işğalından azad edilməsi üçün bütün şəhid olan qəhrəman vətən övladlarının əziz xatirəsini ehtiramla yad edir, qazilərə can sağlığı arzulayıram. Şəhidlərin ruhları şad, məkanları cənnət olsun”.
Bunu BAYRAQDAR MEDİA-ya Türkiyənin Azərbaycandakı sabiq hərbi attaşesi, ehtiyatda olan general Dr. Yücel Karauz deyib.
Anım Günü ilə bağlı fikirlərini bölüşən general bildirib ki, 27 sentyabr təkcə Azərbaycan üçün deyil, türk dünyası baxımından da önəmli səbəb və nəticələri olan bir tarixdir: “İki il öncə sentyabrın 27-də başlayan Vətən müharibəsi ilə Azərbaycan öncəliklə 200 illik bir geri çəkilməyə, ərazi itkisinə son qoyaraq torpaqlarını işğaldan azad etmişdir. Bu qələbənin digər bir önəmi odur ki, Azərbaycan artıq Qafqazın aparıcı güc mərkəzinə çevrilib. Bu müharibə eyni zamanda cənab Prezident İlham Əliyevin siyasi, diplomatik və sərkərdəlik qabiliyyətini bütün dünyaya nümayiş etdirdi. 44 günlük müharibənin demək olar ki, hər günündə dünyanın nüfuzlu televiziyalarına, o cümlədən qəzet və informasiya agentliklərinə müsahibələr verən cənab Prezident Azərbaycanın haqq davası haqqında bütün dünyanı bilgiləndirdi. Həmin günlər cənab İlham Əliyev bir orduya bərabər işlər gördü. O, həm Ali Baş Komandan kimi Azərbaycan Ordusuna uğurla rəhbərlik etdi, həm də bacarıqlı bir dövlət başçısı kimi Azərbaycan həqiqətlərini bir daha bütün dünyaya çatdırdı”.
Dr. Yücel Karauz deyib ki, sentyabrın 27-də başlayan Vətən müharibəsi Azərbaycan Ordusunun gücünü də bütün dünyaya göstərdi: “Azərbaycan Ordusunun artıq Qafqazın ən güclü ordusu olduğunu hər kəs gördü və bildi. 27 sentyabrda başlayan Vətən müharibəsi son dönəmlərdə ən qısa müddətdə aparılan, ildırım sürətli müharibə kimi dünya hərb tarixinə qızıl hərflərlə yazıldı. Bu müharibə müzəffər Azərbaycan Ordusunun bütün sahələrdə nəyə qadir olduğunu göstərdi. Minimum itkilərlə maksimum nəticə əldə edən Azərbaycan Ordusunun bu zəfəri bu gün dünyanın müxtəlif hərbi mərkəzlərində öyrənilir. Bu zəfər bir növ hibrid müharibələrin ən böyük örnəyi olmuşdur. Bu müharibə müasir hərbi texnikanın yüksək vətənsevərlik ruhu olan əsgərlə vəhdəti kimi də tarixə düşdü. Bu müharibə Azərbaycan gənclərinin necə bir qəhrəmanlıq dastanı yazdığını da nümayiş etdirdi. İki il öncə Vətən, millət və bayraq üçün döyüşən qəhrəman Azərbaycan övladları öz qanları ilə şanlı tarix yazdılar”.
Onun sözlərinə görə, bu müharibə Türkiyə-Azərbaycan qardaşlığının sarsılmazlığını bir daha dünyaya göstərdi: “Vətən müharibəsində birlik-bərabərlik nümayiş etdirən Türkiyə-Azərbaycan qardaşlığı müharibədən sonra imzalanan Şuşa Bəyannaməsi ilə yeni və daha strateji mərhələyə qədəm qoydu. 27 sentyabrdan sonra başlanan proses eyni kök və soydan gələn Türkiyə ilə Azərbaycanın əlaqələrinin maksimum səviyyəyə çatması və Şuşa Bəyannaməsindən güc alaraq Dəmir yumruğun Polad yumruğa çevrilməsidir. Vətən müharibəsində əldə edilən qələbə, həmçinin, bütün türk dünyası baxımından dönüş nöqtəsi oldu. Bu qələbə bütün türk dünyasını qürurlandırdı”.
