Vüqar İskəndərov: Hər seçkidə “ən yaxşı erməni sevdalısı” qlafına girən Nensi Pelosi növbəti seçki ərəfəsində də öz rolunu məharətlə oynamaq istəyir
BAYRAQDAR MEDİA – “Uzun zaman ABŞ-dakı ermənipərəst qüvvələrin “xaç anası” rolunu məharətlə yerinə yetirən Nensi Pelosi son vaxtlar öz aktivliyini bir qədər də artırıb. Bu da səbəbsiz deyil. Çünki okeanın o tayında növbəti seçkilərə hazırlaşırlar. Əslində, bu qoca qadının yaşının o vaxtıdır ki, ona ermənilərin “xaç nənəsi” desək daha doğru olar”.
Bunu BAYRAQDAR MEDİA-ya açıqlamasında Milli Məclisin deputatı Vüqar İskəndərov deyib.
Onun sözlərinə görə, hər seçkidə “ən yaxşı erməni sevdalısı” qlafına girən bu qadın növbəti seçki ərəfəsində də öz rolunu məharətlə oynamaq istəyir: “Bunun üçün isə yeni səhnə olaraq Ermənistanın paytaxtı seçilib. Yəni, bu bir həqiqətdir ki, N.Pelosinin Ermənistana səfəri seçkiqabağı dövrdə ABŞ-dakı erməni lobbisinin dəstəyini qazanmaq məqsədi daşıyır. Artıq 82 yaşı olan N.Pelosi hələ də Konqresdə kürsüsünü qoruyub saxlamaq haqqında düşünür və buna görə də ermənilərə bacarığı qədər “xaç nənəliyi” etməklə fərqlənmək istəyir”.
Deputat qeyd edib ki, N.Pelosinin Ermənistana son səfəri və səfər zamanı səsləndirdiyi əsassız iddialar da onun Birləşmiş Ştatlardakı ermənilərdən növbəti səs dilənməsi kimi dəyərləndirilə bilər.
V.İskəndərov bildirib ki, əsasən separatçılığı dəstəkləməklə də ad çıxaran bu xanım siyasətçi bir qədər öncə Tayvana səfər etməklə dünya miqyasında gərginliyə səbəb olmuşdu: “Bir müddət öncə N.Pelosi Tayvana səfər etməklə separatizmin dəstəkçisi olduğunu açıq nümayiş etdirdi. İndi isə o, Ermənistanda peyda olub. Özü də Ermənistanın Azərbaycana qarşı növbəti hərbi təxribatından sonra”.
N.Pelosinin “erməni soyqırımı” abidəsi önünə gül qoyarkən ağlamasına gəlincə deputat deyib: “Əslində, N.Pelosinin etdikləri səlibçi təfəkkürün nümunəsidir. Onun timsah göz yaşları isə bəsit auditoriyaya hesablanmış oyundur. Əgər o həqiqətən də səmimidirsə o zaman ermənilər Xocalıda günhasız azərbaycanlıları soyqırımına məruz qoyanda niyə “kor” və “lal” olmuşdu? Ermənistanın ərazi bütövlüyünə belə təəssüb göstərən N.Pelosi əgər bu qədər ədalətlidirsə, o zaman 30 illik Ermənistan işğalçılığı dövründə niyə səsini çıxarmadı? Niyə həmin illərdə bircə dəfə də olsun Azərbaycana səfər etmədi? Əlbəttə sualların sayını artırmaq olar. Amma elə bu suallar da yetərlidir. Yəni öz postunu qorumaq üçün ermənilərin ayağına düşən bu qadının əsl niyyəti, məqsədi və səfərinin arxasında gizlənən səbəb bəllidir”.
