SEPAH-a bağlı sosial media hesablarında İranın Azərbaycana hərbi müdaxilə etməsinə dair çağırışlar yer alır
BAYRAQDAR MEDİA – Dostu, qardaşı Ermənistanın ölümcül məğlubiyyətini həzm edə bilməyən İranın fars-molla rejimi Azərbaycana diş qıcamaqda davam edir. Bu yaxınlarda isə İran tərəfindən bu yöndə növbəti hədsizlik edilib.
Araz News xəbər verir ki, molla rejimi indi də Naxçıvana dil uzadıb.
Məlumata əsasən, sosial şəbəkələrdə İran prezidenti İbrahim Rəisinin ölkə ostanlarına növbəti səfərinin təbliğatına həsr edilmiş bir videosüjet yayımlanıb: “Videosüjetin giriş qismində bir xəritə əks olunub. Həmin xəritədə isə Naxçıvan İrana birləşdirilib”.
Lakin molla rejiminin hədsizliyi bununla da tamamlanmayıb: “Sosial şəbəkələrdə SEPAH-a dolayısı ilə bağlı olan media hesabları hərəkətə keçib. O sosial media hesabları SEPAH-dan qidalanaraq bu qurumun müxalifətə qarşı sifarişlərini yerinə yetirirlər. Həmin sosial media hesablarından birində bu xəritə olayına şərh verilərək, İ.Rəisinin görüşündən bəhs edən videosüjetdə ilk başdakı xəritədə Naxçıvanın İrana birləşdirilməsinin təsadüfi olmadığı bildirilib. Belə bir təbliğat aparılır ki, Naxçıvan mütləq İrana birləşdirilməlidir. Çünki bu zaman Türkiyə ilə Azərbaycanın, həmçinin türk dünyasının əlaqələri kəsiləcək”.
Məlumatda bildirilir ki, bu tip digər sosial media hesablarında isə bir qədər də irəli gedilib: “Belə bir təbliğat aparılır ki, əgər Azərbaycan Zəngəzura hərbi baxımdan daxil olsa o zaman İran əraziyə hərbi müdaxilə etməli, yaxud da Azərbaycana raket zərbələri endirməlidir. Yəni bütün bu anti-Azərbaycan kampaniyası eyni vaxtda aparılır. Özü də tezislər də oxşardır. Aydın görünür ki, bu tezisləri onlara bir mərkəzdən verirlər”.
Bu hesablardan birində isə oktyabrın İran üçün fürsət ola biləcəyi vurğulanır: “Bildirilir ki, oktyabrda İran Azərbaycana, xüsusilə də Zəngəzura və Naxçıvana hərbi müdaxilə etməlidir”.
