Emin Həsənli: ABŞ və Fransanın məlum davranışı, Rusiya sülhməramlılarının öz funksiyasını yerinə yetirməməsi Ermənistandakı bəzi qüvvələrdə hansısa ümid yaradır
BAYRAQDAR MEDİA – “Ermənistan heç vaxt beynəlxalq hüquqa əməl etməyib. Götürdüyü öhdəlikləri yerinə yetirməyib. Vətən müharibəsindən sonra gözlənilirdi ki, Ermənistan ağlını başına yığsın. Ancaq bu ölkənin xarici havadarları, xüsusilə də ABŞ və Fransa faktiki olaraq sülhün əldə edilməməsi üçün atılan təxribatçı addımlarda Ermənistana dəstək olur. Əslində, bu ölkələrin hazırda sərgilədiyi yanaşma heç də təəccüblü deyil. Çünki zamanında torpaqlarımızın uzun illər işğalda qalmasına da səbəb olan məhz bu dövlətlər idi. ATƏT-in Minsk Qrupunun üzvü kimi bu ölkələr uzun illər yalnız regiona aldadıcı səfərlər etməklə yadda qaldılar”.
Bunu BAYRAQDAR MEDİA-ya özəl açıqlamasında “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli deyib.
Müsahibimiz qeyd edib ki, bu yaxınlarda diplomatik korpusun Şuşaya səfərində bu iki dövlətin ermənipərəst mövqeyini yenə gördük: “Bu iki dövlətin səfirləri Şuşaya getmədilər. Onlar hələ də ölmüş ATƏT MQ-ni diriltmək xəyalındadırlar”.
Ermənistan tərəfindən son günlər Azərbaycan Ordusunun mövqelərinin atəşə tutulmasına münasibət bildirən ekspert deyib ki, indiki halda Ermənistanın bu cür davranışlarına görə Rusiya sülhməramlıları da məsuliyyət daşıyır: “Rusiya sülhməramlıları öz funksiyalarını normal şəkildə yerinə yetirməyiblər. Konkret olaraq 2020-ci il 10 noyabr Bəyanatında açıq qeyd edilir ki, Qarabağdan qanunsuz erməni silahlı qüvvələri çıxacaq və əvəzində Rusiya sülhməramlıları gələcək. Amma hələ də o silahlı qüvvələr bölgədən çıxarılmayıb. Bu da haqlı olaraq Azərbaycanın narazılığına səbəb olur”.
E.Həsənlinin sözlərinə görə, bütün bu sadalananlar Ermənistandakı bəzi qüvvələr üçün “stimul” rolunu oynayır: “ABŞ və Fransanın məlum davranışı, Rusiya sülhməramlılarının öz funksiyasını yerinə yetirməməsi Ermənistandakı bəzi qüvvələrdə hansısa ümid yaradır. Amma əbəs yerə. Onlar bir şeyi bilməlidir ki, illərlə bu boyda dəstək alsalar da nə Qarabağda tam məskunlaşa bildilər, nə də digər addım ata bildilər. Əsası Ulu öndər Heydər Əliyev tərəfindən qoyulan uğurlu siyasətin, diplomatiyanın Prezident İlham Əliyev tərəfindən davam etdirilməsi öz bəhrəsini verdi. Azərbaycan diplomatiyasının uğuru və Azərbaycan Ordusunun qətiyyəti öz sözünü dedi. Azərbaycan bütün cəbhələrdə qalib oldu. Bu gün torpaqlarımız işğaldan azad edilib”.
“Ermənistan hakimiyyəti, o cümlədən oradakı revanşist qüvvələr bilməlidir ki, Azərbaycan bundan sonra da qarşısına qoyduğu məqsədlərə nail olacaq. Ona görə də Ermənistan ağlını başına toplayıb, bir an öncə sülh sazişini imzalamalıdır. Əks halda bu ölkə daha böyük faciələrlə üzləşəcək”, – deyə ekspert sonda əlavə edib.
