BAYRAQDAR MEDİA – Azərbaycan Diaspor Könüllülərinin mədəniyyət paytaxtımız Şuşaya səfəri başa çatıb.
Bu barədə BAYRAQDAR MEDİA-ya Diasporla İş üzrə Dövlət Komitəsindən məlumat verilib.
Məlumatda bildirilib ki, “Azərbaycan Diaspor Könüllüləri” proqramının koordinatoru Bəxtiyar Rəhimov gənclərin səfər proqramında nəzərdə tutulmuş bütün tarixi və mədəni məkanları ziyarət etdiklərini deyib: “Qeyd edib ki, “Bazarbaşı”, Cıdır düzü, güllələnmiş heykəllərin olduğu meydan, Şuşa Bəyannaməsinin imzalandığı məkan, Xurşidbanu Natəvanın sarayı, Xan qızı bulağı, Molla Pənah Vaqifin məqbərəsi, Üzeyir Hacıbəylinin heykəli, Bülbülün ev-muzeyi, Gəncə qapısı, Saatlı, Aşağı və Yuxarı Gövhərağa məscidləri könüllülər tərəfindən maraqla qarşılanıb”.
Diaspor könüllüləri, həmçinin mədəniyyət paytaxtımızda aparılan yenidənqurma və abadlıq işləri ilə tanış olublar: “Ənənəyə uyğun olaraq diaspor könüllüləri Cıdır düzündə iri ölçülü Azərbaycan bayrağını dalğalandırıb və “Qarabağ Azərbaycandır!” şüarını səsləndiriblər. Qarabağ Zəfərinə görə Müzəffər Ali Baş Komandan İlham Əliyevə və rəşadətli Azərbaycan Ordusuna təşəkkürlərini ifadə edən könüllülər Vətənimizin ərazi bütövlüyü uğrunda canlarından keçmiş şəhidlərimizin əziz xatirəsini yad edib, qazilərimizə cansağlığı arzulayıblar”.
Qeyd edək ki, Diasporla İş üzrə Dövlət Komitəsinin dəstəyi və təşkilatçılığı ilə “Biz dəmir yumruğun gücü ilə Şuşadayıq” layihəsi çərçivəsində baş tutan səfərdə 50 könüllü və komitə əməkdaşları iştirak ediblər. Səfər gənclərin işğaldan azad edilmiş ərazilərimizdə, xüsusilə də Şuşa şəhərində vaxtilə ermənilərin törətdikləri dağıntı və vandalizm aktlarını görməsi, insani dəyərlərə zidd olan bu vəhşiliklərə sosial şəbəkələr vasitəsilə diqqət cəlb edilməsi məqsədilə təşkil olunub.
