BAYRAQDAR MEDİA – Neftçilərin Hüquqlarını Müdafiə Təşkilatı İctimai Birliyi tərəfindən “Vətəndaşların pozulmuş hüquqlarının bərpası üçün hüquqi yardımların təşkili vasitəsi ilə hüquq sistemi və qanunun aliliyi prinsipinin bərqərar olmasına dəstək verilməsi” layihəsinin icrasına başlanılıb.
Bu barədə BAYRAQDAR MEDİA-ya İctimai Birlikdən məlumat verilib.
Bildirilib ki, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə reallaşan layihənin məqsəd və vəzifələri əsasən aşağıdakılardır: Keyfiyyətli hüquqi yardıma əlçatanlığın təmin edilməsi və sosial cəhətdən zəif müdafiə olunmuş digər insanların qanuni hüquq və maraqlarının daha səmərəli müdafiəsini təşkil edilməsi; Vətəndaşların pozulmuş hüquqlarının bərpası üçün müraciətlərin artması ilə hüquq sistemi və qanunun aliliyi prinsipinin bərqərar olmasına dəstək verilməsi; Pozulmuş hüquqların bərpa edilməsi üçün vətəndaşların hərəkətinin təşviq edilməsi.
Qeyd olunub ki, layihə çərçivəsində hüquqi yardıma ehtiyacı olan vətəndaşlara məsləhətlər veriləcək: “Onlar üçün müvafiq qurumlara müraciətlər, ərizə və şikayətlər tərtib ediləcək. Məhkəmə orqanlarına müraciətin zəruri olduğu hallarda iddia ərizələri tərtib ediləcəkdir. Qəbul günlərindən başqa günlərdə də ehtiyacı olan vətəndaşlara hüquqi yardım göstəriləcəkdir. Yazılı, şifahi müraciətlər, telefon, veb-sayt, sosial şəbəkələr vasitəsi ilə cavablandırılacaq. Layihənin icrası çərçivəsində “UNİON” vəkil bürosu və ekspert-hüquqşünas ilə bağlanmış müqavilə əsasında üç ay müddətində (01.09.2022-01.12.2022 il) Bakı, Şirvan, Masallı, Mingəçevir şəhərlərində vətəndaşların qəbul günləri və hüquqi yardım aksiyaları təşkil ediləcək”.
