Son yeniləmə: 30 Avqust 2022 14:54
Türkiyə Müharibə Qaziləri Dərnəyinin dəvəti ilə Emin Həsənli də bu tədbirlərdə iştirak edir
BAYRAQDAR MEDİA – “Bu il 30 avqust Zəfərinin yüz illiyi qeyd edilir. Bu münasibətlə Türkiyədə çeşidli yerlərdə möhtəşəm tədbirlər keçirilir. Türkiyə Müharibə Qaziləri Dərnəyinin təşkil etdiyi belə möhtəşəm tədbirlərdən biri də Kütahyada keçirilir. Mən də bu tədbirlərdə iştirak edirəm”.
Bunu BAYRAQDAR MEDİA-ya “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli deyib.
Onun sözlərinə görə, “Büyük Taarruz” məhz yüz il öncə buradan başlayıb: “Burada olmaqdan məmnunluq keçirirəm. Bayram çərçivəsində Türkiyə Silahlı Qüvvələrinin hərbi hissələrində görüşlər keçirilir. Eyni zamanda bayram ərəfəsində avqustun 29-da qardaş Türkiyənin Cümhurbaşqanı Recep Tayyip Erdoğan Kütahyaya gəldi.
“Şəhərin ən böyük meydanında izdihamlı bayram mitinqi keçirdi. Mən də onunla görüşmək şərəfinə nail oldum və təbriklərimi çatdırdım. Eyni zamanda avqustun 29-da Türk Hava Qüvvələrinə bağlı olan Hava Er Eğitim Tugayında olduq. Orada bu Tuğayın komandanı Tuğgeneral Necati Gündüz bizim şərəfimizə ziyafət verdi”.
Səfər çərçivəsində bir sıra görüşlərdə, o cümlədən Kütahya valiliyində keçirilən tədbirdə iştirak edən E.Həsənli avqustun 30-da da Kütahyanın mərkəzi meydanında keçirilən Zəfər Bayramı paradına qatılıb.
Bayramdan öncə Kütahyanın Şəhidllər xiyabanı ziyarət edilib.
