Emin Həsənli: Türkiyə tarixində 30 avqust Zəfərinin müstəsna əhəmiyyəti var
BAYRAQDAR MEDİA – “Türkiyə tarixində 30 avqust Zəfərinin müstəsna əhəmiyyəti var. 1922-ci ildə Qazi Mustafa Kemal Atatürkün rəhbərliyi ilə türk milləti, türk silahlı qüvvələri çox böyük uğur əldə edərək, Yunanıstan ordusu üzərində sarsıdıcı qələbə qazandı. Bununla da Türkiyənin İstiqlal müharibəsinin taleyi həll edildi. Ondan da bir neçə gün sonra, sentyabrın 9-da İzmir işğaldan azad edildi və bütövlükdə müasir Türkiyənin torpaqları azad edildi. Beləliklə, 1919-cu il mayın 19-dan etibarən davam edən bu mücadilə türk millətinin qələbəsi ilə nəticələndi və Türkiyə Cümhuriyyəti yarandı”.
Bunu BAYRAQDAR MEDİA-ya 30 Avqust Zəfər Bayramı və Türkiyə Silahlı Qüvvələr Günü münasibətilə özəl açıqlamasında “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli deyib.
Türkiyə dünyanın 7 nəhəng dövləti ilə savaşdı və qalib gəldi
Emin Həsənli bildirib ki, Türkiyə dünyanın 7 nəhəng dövləti ilə savaşdı və qalib gəldi: “Bu qələbəni əldə etmək heç də asan deyildi. Osmanlı dünyanın dörd bir tərəfində məğlub olmuşdu. Düşmən qüvvələri bütövlükdə Türkiyənin ərazisini işğal etmişdi. Mustafa Kemal Atatürk məhz belə bir vaxtda, çox ağır şərtlər daxilində bir neçə silah yoldaşı ilə mübarizəyə qalxdı və Türkiyəni işğaldan azad etdi. 30 avqust Zəfəri qazanıldı. Bu, dünya tarixinə qızıl hərflərlə yazılmış bir Zəfərdir. Mahatma Qandi bu hadisəni qiymətləndirərərk demişdi ki, Atatürk qalib gələndən sonra biz bildik ki, ingilislər Allah deyil. Ona qədər isə elə biliridk ki, ingilislər Allahdır, onlara qalib gəlmək olmaz”.
Müsahibimiz onu da bildirib ki, Türkiyə Cümhuriyyətinin yaranmasının tarixdə çox böyük önəmi var: “Türklər əsrlər boyu müstəqil yaşayıblar. Türkiyə Cümhuriyyətinin qurulmasında Azərbaycan türklərinin də rolu var. Bakı milyonçuları, neft zənginləri o zaman İstiqlal savaşına böyük dəstək göstərmişdi. Azərbaycan türkləri eyni zamanda bu döyüşlərdə iştirak etmişdi. 1918-ci ildə Bakını Nuru Paşanın komandanlığında işğaldan birgə azad etdiyimiz kimi, Türkiyə Cümhuriyyətinin qurulmasında da, ondan öncə Çanakkale savaşında da bərabər döyüşmüşük”.
Yüz il əvvəl olduğu kimi…
E.Həsənli qeyd edib ki, yüz il əvvəl olduğu kimi bu gün də Azərbaycanla Türkiyə iki qardaş ölkə olaraq çiyin-çiyinədir: “Türkiyənin ən ağır günlərində Azərbaycan qardaş ölkənin yanında olub. Azərbaycanın ən ağır günlərində Türkiyə yanımızda olub. Ulu öndər Heydər Əliyevin “bir millət – iki dövlət” fəlsəfəsindən güc alan Türkiyə-Azərbaycan qardaşlığı hər ötən gün daha da güclənir. Məhz İkinci Qarabağ savaşında Recep Tayyip Erdoğan başda olmaqla 84 milyonluq Türkiyə Azərbaycanın yanında oldu, Azərbaycana mənəvi-siyasi dəstək verdi. Qardaş Türkiyə 2020-ci ildə Azərbaycanın əldə etdiyi tarixi Zəfəri bizimlə birgə qutladı. Azərbaycan Ordusunun formalaşmasında da Türkiyə silahlı qüvvələrinin böyük rolu var. Məhz Azərbaycanın Vətən müharibəsində qazandığı tarixi Zəfərdən sonra cənab Prezident İlham Əliyev və qardaş ölkənin Cümhurbaşqanı Recep Tayyip Erdoğan tərəfindən Şuşa Bəyannaməsinin imzalanması da əməkdaşlığın, qardaşlığın əbədi olacağına daha bir sübutdur”.
