Yüz il əvvəl olduğu kimi bu gün də Azərbaycanla Türkiyə çiyin-çiyinə dayanaraq tarix yazır
BAYRAQDAR MEDİA – Qardaş Türkiyənin dövlətçilik tarixində mühüm yerlərdən birini tutan 30 Avqust Zəfər Bayramının 100-cü ildönümü qeyd edilir. Əslində, 30 avqust Türkiyə Cümhuriyyətinin quruluşunun başlanğıcı kimi qəbul edilir və o mənanı daşıyır. Çünki türk xalqı və Türkiyə Silahlı Qüvvələri Mustafa Kemal Atatürkün öndərliyi ilə məhz 1922-ci il avqustun 30-da tarixi Zəfərini qazanıb. Ancaq bu tarixi Zəfər heç də asanlıqla qazanılmayıb. Təkcə Türkiyənin deyil, eyni zamanda türklüyün şərəf tarixi olan 30 avqusta aparan yolda saysız-hesabsız savaşlar baş verib, türk millətinin qeyrətli oğul və qızlarının qanları axıdılıb.
Yüz il öncə nələr olub?
Beləliklə, 30 avqust Zəfərinin hansı önəm daşıdğını daha geniş şəkildə oxucuya çatdırmaq üçün yüz il öncə olanlara qısa ekskurs etmək yerinə düşər. Məhz onda türk dünyasının başı üzərini yenidən qara buludlar almışdı.
Düşmən, işğalçı ölkələr Birinci Dünya müharibəsindən məğlub çıxan Osmanlı dövlətinin ərazilərini öz aralarında paylaşmaq planları üzərində baş sındırırdı. 1919-cu ildə Anadolu düşmən qüvvələr tərəfindən işğal edilmişdi. Düşmənin donanması İstanbulu zəbt etmiş, Fransız ordusu Adanada, ingilislər Urfa, Maraş, Samsun və Merzifonda, İtalyanlar Antalya və Anadolunun cənub-qərbində yerləşmişdilər. Müttəfiq qüvvələrin razılığı ilə 1919-cu il mayın 15-də yunan qoşunlarının İzmirə çıxması vəziyyəti daha da ağırlaşdırmışdı.
Məhz belə bir ağır dövrdə türk xalqı Mustafa Kemal Paşanın rəhbərliyi ilə azadlıq, istiqlal müabrizəsinə qalxdı. Bu mücadilə 1919-1922-ci illər arasında gerçəkləşərək 11 oktyabr 1922-ci ildə imzalanan Mudanya müqaviləsiylə faktiki və 24 iyul 1923-cü ildə imzalanan Lozan anlaşmasıyla rəsmən sona çatdı.
Qeyd etmək yerinə düşər ki, Türkiyə Cümhuriyyətinin varlığına aparan İstiqlal Savaşı dörd mərhələyə ayrılır. Bu tarixi mərhələlər içərisində 30 Avqust Zəfər Bayramının xüsusi yeri var. Zəfər Bayramı 1922-ci ilin 26 avqustunda başlayıb 30 avqustda Kütahyada, Dumlupınarda Mustafa Kemal Atatürkün baş komandanlığı ilə qələbəylə nəticələnən “Başkomutanlıq Meydan Müharibəsi”ni (Büyük Taarruz) anmaq üçün qeyd edilən bayramdır. İşğalçı orduların ölkə sərhədlərindən çıxması bir qədər sonra baş versə də 30 avqust simvolik olaraq ölkə torpaqlarının geri alındığı günü təmsil edir.
Türklüyün şərəf tarixində önəmli günlərdən biri
Beləliklə, bu gün türklüyün şərəf tarixində önəmli günlərdən biridir. Çünki Türkiyənin Azərbaycandakı sabiq hərbi attaşesi, ehtiyatda olan general Dr. Yücel Karauzun ötən il BAYRAQDAR MEDİA-ya açıqlamasında dediyi kimi, 1922-ci il 30 avqust zəfərindən sonra 1923-cü ildə Türkiyə Cümhuriyyətinin qurulması ilə yeni bir dönəm başlayıb.
Həmin vaxtdan etibarən güclənən Türkiyə ordusu və Türkiyə Cümhuriyyəti 1950-ci illərdə NATO ilə bərabər Koreya hərəkatında iştirak etdi. 100 il öncə qazanılan avqust zəfərindən güc alan Türkiyə Ordusu 1974-cü ildə Kıbrıs Barış Hərəkatı ilə növbəti qəhrəmanlıq dastanı yazdı. 30 avqust Zəfərinin nəticəsi olaraq bu gün mavi vətən etibarlı şəkildə qorunur.
100 il öncə əldə edilən zəfərdən, həmçinin hazırda Cümhurbaşqanı Recep Tayyip Erdoğanın qətiyyətindən güc alan Türkiyə ordusu bu gün “Barış Pınarı” hərəkatı, “Zeytin Dalı” hərəkatı, o cümlədən İraq və Suriyada terrorçulara qarşı uğurlu əməliyyatlar həyata keçirərək tarix yazmaqda davam edir. Türkiyə ordusu eyni zamanda Liviyada, Əfqanıstanda sülhün və təhlükəsizliyin qorunmasına töhfə verir. Ümumilikdə bu gün dünyanın müxtəlif yerlərində Türkiyə əsgəri sülhün və sabitliyin qorunmasında önəmli rol oyanyır.
Birdir bizim amalımız
Qardaş Türkiyə həmçinin, bu gün Qafqazın əsas gücü olan Azərbaycanla birlikdə “Bir millət – iki dövlət” prinsipi əsasında Zəfər paradlarında dünyaya birlik, bərabərlik və sülh mesaji verir. Yüz il əvvəl olduğu kimi, bu gün də Azərbaycanla Türkiyə çiyin-çiyinə dayanaraq tarix yazır. Azərbaycan Prezidenti İlham Əliyevin Türkiyənin Zəfər Bayramı münasibətilə Cümhurbaşqanı Recep Tayyib Erdoğana göndərdiyi təbrik məktubunda da qeyd edildiyi kimi, “Bir millət – iki dövlət” prinsipinə əsaslanan Azərbaycan-Türkiyə birliyinin, qardaşlığının və müttəfiqliyinin dünyada bənzəri yoxdur.
Sonda qeyd etmək yerinə düşər ki, yüz il öncə Türkiyə Ordusu dahi Mustafa Kemal Atatürkün öndərliyi ilə inanılmaz və misilsiz qəhrəmanlıq göstərərək tarixi Zəfər əldə etdiyi kimi, 2020-ci ildə də Ali Baş Komandan İlham Əliyevin rəhbərliyi ilə rəşadətli Azərbaycan Ordusu tarixi Zəfərini qazandı. Bu gün 30 avqust Zəfəri təkcə Türkiyənin deyil, eyni zamanda Azərbaycanın və bütövlükdə türk dünyasının bayramı kimi qeyd olunur. Bu gün həm də Azərbaycanın Vətən müharibəsindəki tarixi Zəfəri başda Türkiyə olmaqla bütün türk dünyasını qürurlandırır.
Bu tarixi gün münasibətilə qardaş Türkiyəni təbrik etməklə yanaşı, “Bizə ZƏFƏRlər yaraşır!” deyirik.
100’ÜNCÜ YILINDA BÜYÜK ZAFER'İN AYAK SESLERİ – 5⃣
30 Ağustos artık Yunan ordusu için son gündü. Yunan kuvvetleri Çalköy'de sabaha doğru karmakarışık bir hâlde toplandı. Saat 06.30'da Türk ordusuna Yunan ordusunun imhası için gerekli talimat verildi. #MSB #BüyükTaarruz pic.twitter.com/Ylbgev0xJj
— T.C. Millî Savunma Bakanlığı (@tcsavunma) August 30, 2022
