BAYRAQDAR MEDİA – “Azərbaycan Respublikasının Prezidentinin 28 fevral 2022-ci il tarixli, 3163 nömrəli Sərəncamı ilə təsdiq edilmiş “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2026-cı illər üçün Dövlət Proqramı”na ilk qəbul üzrə növbəti nəticələr müəyyən olunmuşdur. Belə ki, 98 nəfər namizəd magistraura səviyyəsi üzrə müvafiq Seçim Qaydalarına aid meyarlara uyğun olaraq Dövlət Proqramına qəbul olmuş və proqram iştirakçısı adını qazanmışdır”.
BAYRAQDAR MEDİA-ya avqustun 27-də Elm və Təhsil Nazirliyindən verilən məlumatda belə deyilir.
Qeyd edilir ki, təqaüd qazanan gənclər iqtisadiyyat, maliyyə, mühəndislik, təhsil, dövlət idarəetməsi kimi ixtisas istiqamətləri üzrə Türkiyə, Almaniya, ABŞ, Böyük Britaniya və Şimali İrlandiya Birləşmiş Krallığı, İspaniya, Kanada, Belçika, İsveçrə və İsveç kimi ölkələrdə təhsil alacaqlar: “Proqram iştirakçıları “Istanbul University”, “University of Bonn”, “University of Freiburg”, “George Washington University(DC)”, “University of California, Davis”, “Imperial College London”, “King’s College London”, “University of Manchester”, “University of Glasgow”, ”University of Sussex”, “University of Warwick”, “Queen Mary University of London”, “University of Exeter”, “Autonomous University of Barcelona”, “Sapienza University of Rome”, “University of Tartu”, “University of Alberta”, “University of Toronto”, “Ghent University”, “Vrije Universiteit Brussel”, “École Polytechnique Fédérale de Lausanne”, “University of Basel”, “Uppsala University” kimi nüfuzlu təhsil müəssisələrində təhsillərini davam etdirəcəklər”.
Qeyd edilib ki, Dövlət Proqramına dünyanın 30 ölkəsinə aid 15 prioritet ixtisas sahələri üzrə 673 nəfər Azərbaycan vətəndaşı müraciət edib: “Nəticədə 80 nəfər bakalavriat, 247 nəfər magistratura səviyyəsi üzrə olmaqla ümumilikdə 327 nəfər proqram təqaüdçüsü seçilmişdir. Kvotada boş təqaüd yerlərinin olduğunu nəzərə alaraq 10 avqust 2022-ci il tarixində açıq elan edilmiş sənəd qəbulu 25 avqust 2022-ci il tarixində yekunlaşmışdır. Müvafiq qəbul üzrə müsahibə mərhələsinə növbəti həftədən başlanılacaqdır”.
