BAYRAQDAR MEDİA – Əlilliyi olan şəxslərə münasibətdə bir sıra vulqar, qaba ifadələr etik və müasir yanaşmaya uyğun yeni ifadələrlə əvəzlənib.
Bu barədə BAYRAQDAR MEDİA-ya avqustun 25-də Əmək və Əhalinin Sosial Müdafiəsi Nazirliyindən məlumat verilib.
Məlumatda qeyd edilir ki, son illər Azərbaycanda BMT-nin “Əlilliyi olan şəxslərin hüquqları haqqında” Konvensiyasına uyğun şəkildə aparılan islahatlarla əlilliyi olan şəxslərlə bağlı qanunvericilikdə mühüm təkmilləşdirmələr aparılıb: “Təkmilləşdirmələrin bir istiqaməti kimi, qanunvericilikdə əlilliyi olan şəxslərə münasibətdə onlarda neqativ hisslər, özünə inamsızlıq yaradan bir sıra vulqar, bayağı, kobud ifadələr müasir və etik yanaşmaya uyğun yeni ifadələrlə əvəzlənib”.
Məlumata əsasən, bununla bağlı 40-dək qanunvericilik aktında dəyişiklik edilib və həmin dəyişikliklər təsdiqlənib. Beləliklə, “lal” sözü – “nitq qabiliyyəti tam məhdud olan” sözləri ilə, “kor” sözü – “görmə qabiliyyəti tam məhdud olan” sözləri ilə, “kar” sözü – “eşitmə qabiliyyəti tam məhdud olan” sözləri ilə, “kəmağıllıq” sözü – “əqli gerilik” sözləri ilə, “şikəst olan” sözləri – “əlilliyi müəyyən edilmiş” sözləri ilə, “bədən qüsuru” sözləri – “fiziki çatışmazlıq” sözləri ilə, “şikəstlik” sözü – “xəsarət” sözü ilə və s. əvəz edilib.
O da qeyd edilib ki, əvvəlki ifadələr əlilliyi olan şəxslərlə bağlı müəyyən mənfi stereotiplərin yaranmasına, onların sosial inteqrasiyasında çətinliklərə səbəb olurdu: “Əlilliyi olan şəxslərə münasibətdə istər danışıqda, istərsə də yazılı mətnlərdə yeni dəyişikliklərə uyğun ifadələrin işlədilməsi həmin şəxslərə, onların xüsusiyyətlərinə hörmətlə yanaşılmasını özündə ehtiva edir”.
