BAYRAQDAR MEDİA – Qardaş Qazaxıstanın Prezidenti Qasım-Jomart Toqayev avqustun 24-də rəsmi səfərlə Azərbaycana gəlib. Ali qonağı Azərbaycan Prezidenti İlham Əliyev təntənəli mərasimlə qarşılayıb.
Xəbəri Azərbaycan Prezidentinin Mətbuat xidməti yayıb.
Qarşılanmanın ardından prezidentlərin təkbətək görüşü olub. Görüşün mətbuata açıq hissəsində hər iki prezident öz dilində çıxış etməklə diqqət çəkib.
Daha sonra Qazaxıstan Prezidenti İ.Əliyevə ölkəsinin ali mükafatlarından olan “Altın Qıran” – “Qızıl Qartal” ordenini təqdim edib.
Təqdimatdan sonra prezidentlər Qarabağ İqtisadi Rayonunda – Füzulidə uşaqlar üçün inşa ediləcək Qurmanqazı adına Yaradıcılığın İnkişafı Mərkəzinin layihəsi ilə tanış olublar.
Layihə ilə tanışlıqdan sonra prezidentlərin də iştirakıyla iki ölkə nümayəndə heyətlərinin geniş tərkibdə görüşü keçirilib. Görüşdə qarşılıqlı maraq doğuran məsələlər haqqında fikir mübadiləsi aparılıb.
Görüşün ardından prezidentlərin iştirakıyla iki ölkə arasında sənədlər imzalanıb.
Bundan sonra prezidentlər mətbuat üçün bəyanatlarla çıxış ediblər.
Prezidentin Mətbuat xidməti xəbər verir ki, rəsmi görüşlərdən sonra Azərbaycan Prezidenti Qazaxıstanlı həmkarının şərəfinə rəsmi ziyafət verib.
